Dos siman pasá, tim di Nationale ombudsman a bolbe tene oranan di konsulta na Bonèiru. Esakinan a wòrdu bon bishitá. Den un par di dia e tim a hasi trámite di kasi 40 pregunta i keho. Dos di e keho aki tabata pa Kinderombudsman.
Tabata remarkabel ku tabata trata tambe di siudadanonan ku ta ménos ábil den e mundu digital i ku ta di edat avansá. Hopi siudadano tambe a apresiá ku nan por a splika nan keho na papiamentu.
Mayoria di e kehonan tabata trata di e Entidat Públiko di Bonèiru (OLB). Frekuentemente, e kehonan aki ta tokante e echo ku siudadanonan no ta risibí reakshon riba nan preguntanan òf petishonnan hasí na OLB. Banda di esei, tabatin kehonan i preguntanan tokante instanshanan manera KPCN, IND i SVB na Hulanda i Kòrsou.
Nos a risibí señalnan tokante e situashon preokupante di hende grandi riba e isla. Por pensa aki riba pobresa i e falta di disponibilidat di fasilidatnan. Ademas, algun hende grandi a indiká ku nan no tin adrès di koreo elektróniko òf lèptòp, i debí na esei nan tin difikultat pa komuniká ku instanshanan. Banda di esei, frekuentemente siudadanonan a enfatisá e nesesidat pa un lokèt hurídiko aksesibel.
Kordinador Gaby von Maltzahn: “Mi ta masha kontentu ku kada bes mas hende sa kon pa haña nos. Anto maske e kòmbersashonnan hopi biaha ta trata tokante temanan difísil ku ta duru pa nan, e siudadanonan sí tin forsa pa rekuperá. Nos komo tim tambe ta hasi nos máksimo esfuerso pa kuminsá traha riba e kehonan i señalnan. Lástimamente, e kehonan tokante OLB nos ta tende nan frekuentemente durante nos konsultanan. Esaki ta un di e puntonan ku OLB tin pa mehorá. Siudadanonan tin e derechi ku ta skucha nan kehonan i ku ta tuma nan na serio.”
