Nationale Ombudsman ta bishitá Boneiru

Riba é página

    Nieuwsbericht
    Reinier van Zutphen, Nationale ombudsman

    Nationale Ombudsman, Reinier van Zutphen, den e siman di 30 di ougùstùs ta bishitá Boneiru. E ta organisá un enkuentro di mesa rondó pa prepará pa e konferensha di e ombudsmannan di Reino na 2022. E konferensha ei ta trata di e relashon entre siudadano i gobièrnu den e parti karibense di Reino. I e ta sigui e konferensha ku Nationale Ombudsman a organisá na Hulanda oropeo na 2019. Tambe ombudsman lo hasi un bishita na su kolega ombudsman Gwendolien Mossel na Sint Maarten.

    Reinier van Zutphen: “Mi ta kontentu ku mi por ta presente na Boneiru atrobe. Ku e medidanan di corona pa hopi tempu no tabata posibel pa biaha. Si e medidanan pèrmití fin di novèmber lo mi organisá e enkuentronan di mesa rondó na Saba i Sint Eustatius tambe.”

    Bishita na e fasilidat di Biba Guiá i opvang di den dia Fundashon Cocari

    Tambe ombudsman ta hasi diferente bishita na Boneiru, entre otro na e fasilidat di Biba Guiá pa hóben di 16 te ku 23 aña ku ta den un trayekto di yudansa pa tempu largu serka kuido di hóben (jeugdzorg). E pilot di dos aña akí, di Biba Guiá a realisá na mart di 2021 na okashon di un rekomendashon for di e rapòrt Ta relevante unda bo kuna a para di Nationale Ombudsman i Ombudsman pa Mucha. Tambe e ombudsman lo bishitá e opvang di den dia Fundashon Cocari: un ehèmpel di ampliashon di previshon pa grandinan di edat. E ampliashon aki a sosodé pa medio di e rekomendashon di Nationale Ombudsman den su rapòrt Bista pa grandinan di edat na Hulanda Karibense.

    Deliberashon ku ombudsman di Sint Maarten

    Na Sint Maarten Reinier van Zutphen ta papia ku Gwendolien Mossel, ombudsman di Sint Maarten, tokante e konferensha ku e ombudsmannan di Reino ta organisá na 2022. Tambe nan lo papia tokante e desaroyonan na okashon di e investigashon ‘Problema di studiante karibense’ i e problemátika di pobresa, tokante kua Nationale Ombudsman ta hasi un seri di investigashon den e parti karibense di Hulanda. Finalmente e ombudsmannan ta papia tokante e koperashon den e Asosiashon Karibense di Ombudsman (CAROA, Caribbean Ombudsman Association), den kua nan tur dos tin funshon ehekutivo.

    E trabou di ombudsman ta sigui

    No opstante e limitashonnan di biahe den esun aña i mei ku a pasa Nationale Ombudsman a empeñá pa e habitantenan di Boneiru, Saba i Sint Eustatius. Asina el a investigá entre otro e tratamentu di keho di Kuerpo Polisial Hulanda Karibense i e Ofisina di Seguro di Kuido Boneiru. Fin di 2020 ombudsman a saka su rapòrt ku den dje su prekupashonnan pa studiante karibense. For di e tempu ei minister di Enseñansa, Kultura i Siensia a laga sa ku e ta traha riba paso pa mehorá e konekshon ku enseñansa na Hulanda Oropeo pa e studiantenan aki. Ombudsman ta sigui e desaroyonan i si ta nesesario òf si no bini un mehorashon sufisientemente rápido, e lo keda empeñá pa esaki.

    Aktualmente Nationale Ombudsman huntu ku Ombudsman pa Mucha ta investigá e problemanan di edukashon komo konsekuensha di pobresa. Nan ta sepra di publiká e investigashon akí banda di mart òf aprel di 2022. Esaki ta e di tres investigashon den un seri di investigashon di e problemátika di pobresa na Hulanda Karibense. Na 2020 Nationale Ombudsman i Ombudsman di Mucha a publiká nan rapòrt tokante hóben hulandes karibense i nan a yama pa yega na un enfoke integral pa kombatimentu di pobresa bou di hóben. Na 2019 Nationale Ombudsman a publiká su rapòrt di pobresa bou di hende grandi di edat.

    Na 2020 Nationale Ombudsman a risibí 145 keho di habitantenan di Hulanda Karibense. E kehonan aki entre otro tabata trata di e Entidat Públiko Boneiru. Pero tambe nan tabata relatá na e krísis di corona.

    Den kombersashon ku e tim di Nationale Ombudsman

    Habitantenan di Boneiru, Sint Eustatius i Saba ku tin un pregunta òf ku ke entregá un keho serka Nationale Ombudsman por akudí na e tim Hulanda Karibense pa esaki:

    E tim ta spera di organisá ora di konsulta na sèptèmber atrobe na Boneiru. Pronto lo anunsiá e tempu eksakto i e sitio. Asina e medidanan di karentena pèrmití, na fin di aña nos lo organisá ora di konsulta atrobe na Saba i Sint Eustatius tambe.