Envolví siudadano i mucha den desishon ku ta toka nan. Kumpli ku derecho fundamental (di mucha) den kaso di saka hende for di nan kas i migrashon. E pregunta si, i kon, gobièrnu ta siña di eksperensia ku trayekto di rekuperashon. Na esaki i na otro tópiko di e Ombudsagènda 2023, Nationale ombudsman, Ombudsman pa mucha i Ombudsman pa veterano e aña aki ta duna atenshon èkstra.
E Ombudsagènda 2023 tin seis tema ku diferente programa di vários aña. Den un programa asina nos ta hasi investigashon, aktividat i rekomendashon í nos ta mónitòr si gobièrnu ta tuma nos proposishonnan pa mehorashon. E temanan ta konektá ku problema den komunidat i e 30 mil kehonan i señalnan ku anualmente nos ta risibí tokante e relashon entre siudadano i gobièrnu.
Influensia
E ombudsmannan ta haña importante pa siudadano i mucha tin influensia riba desishon ku ta toka nan. Pensa huntu i partisipá ta kontribuí na un base di sosten pa maneho di gobièrnu i e konfiansa di siudadano den gobièrnu.
Kuminsamentu di 2023 nos ta kaba investigashon di partisipashon i influensia den e Lei sosten sosial (Wmo, Wet maatschappelijke ondersteuning) i e Lei di Partisipashon. Nos ta start un investigashon di partisipashon i influensia den e Lei pa Hubentut.
Ku bista riba yegada di e Lei di Ambiente i e lei ‘Fortifikashon di partisipashon na nivel desentralisá’ nos ta renobá e Indikadó di Partisipashon di Nationale ombudsman i e toolkit ‘E mihó desishon’ di e Ombudsman pa Mucha. E Indikadó di Partisipashon ta duna direkshon na e trato apropiá di e aporte i bos di siudadano. E toolkit ‘E mihó desishon’ ta yuda profeshonal pa pone e interes di mucha na promé lugá ora ta tuma desishon.
Investigashon di trayekto di reparashon
Tin diferente trayekto di reparashon ta kana kaminda gobièrnu mester kompensá daño na gruponan (grandi) di siudadano, mucha, veterano i empresario. Pensa na e asuntu di kompensashon pa akohida di mucha, e daño di sakamentu di gas na Groningen i Drenthe, traha ku kromo 6 serka defensa i e inundashonnan na Limburg. Ombudsman ta kuminsá un investigashon di e trayektonan di reparashon aki. Nos ta investigá si, i kon, gobièrnu ta siña di eksperensia di e trayektonan di reparashon koriente i ku a sera.
Sakamentu for di kas i migrashon
Pa gobièrnu kumpli ku e derechonan fundamental (di mucha) ta un tema importante pa e ombudsmannan. Nos ta pone atenshon èkstra na bibienda, migrashon i kitamentu di libertat.
Kuminsamentu di e aña aki Nationale ombudsman i Ombudsman pa Mucha a finalisá un investigashon di sakamentu for di kas di famia den situashon vulnerabel. For di esaki a sali ku gobièrnu no tur ora ta kumpli ku su obligashonnan riba tereno di derecho humano i derecho di mucha ora obligá famia di sali for di nan kas. Na 2023 nos ta hasi un investigashon (di kontinuashon) di sakamentu for di kas di famia ku mester sali for di na kas pa motibu di trabou di demolishon òf renobashon.
Riba e tereno di migrashon Nationale ombudsman i Ombudsman pa mucha ta start un investigashon di opstákulo den e kadena di asilo. E Ombudsman pa veterano ta haña señal ku e kuido pa veterano den detenshon no ta na òrdu. P’esei nos ta investigá si a sigui e konsehonan di un investigashon anterior di veterano den detenshon (2021). I kaminda ta nesesario nos ta stimulá esei.
Pobresa
E ombudsmannan ta mira ku mas i mas siudadano tin prekupashon finansiero pasobra bida ta (muchu) karu. P’esei Nationale ombudsman na 2023 ta investigá si, i kon munisipionan ta alkansá habitante ku problema di sèn na tempu i yuda nan promé ku e problemanan bira mas grandi. Tambe nos ta mónitòr si a tuma ofer e konsehonan for di tres investigashon anterior di problema ku tenedó di statùs, hóben den bijstand i hende den Wajong ta eksperensiá. E Ombudsman pa Mucha ke pa bini un enfoke di pobresa di mucha den tur área di bida ku ta frena mucha den nan desaroyo. P’esei Ombudsman pa Mucha ta konsehá ministerio di Asuntunan Sosial i Labor (SZW, Sociale Zaken en Werkgelegenheid) tokante e elaborashon mas aleu di e Plan Nashonal Garantia di Mucha i e Enfoke di problema di sèn, pobresa i debe.
Tema nobo: kurso di bida i desaroyo
Problema manera pobresa, kriminalidat i violensia por pasa di generashon pa generashon. Na 2023 Ombudsman pa Mucha ta investigá kon problema di famia ta sigui influensiá e bida i desaroyo di mucha i kon esaki ta influensiá nan konfiansa den polítika, i komunidat.
Sigui lesa
E Ombudsagenda 2023 ta konsistí di e siguiente seis temanan: Derecho fundamental, Partisipashon i influensia, Akseso na previshon, Pobresa, Habitabilidat i Kurso di bida i desaroyo. Pa kada tema lesa mas di nos aktividatnan den diferente programa di vários aña.