Margrite Kalverboer huramentá komo Ombudsman pa Mucha

margrite kalverboer

Awe Presidente di Tweede Kamer, Khadija Arib, a huramenta Margrite Kalverboer komo Ombudsman pa Mucha. Kalverboer (1960) ta bisa den un promé reakshon: ‘Mi ta desea di hasi algu pa mucha ku ta kay pafó di e bista direkto, manera mucha ku ta ser maltratá i ku nos no konosé, mucha di mayor vulnerabel ku ta karga peso demasiado grandi. E tratado di derecho di mucha ta stipula ku e interés di e mucha ta e promé konsiderashon den tur desishon ku ta tuma enkuanto mucha, ku tur mucha tin derecho riba desaroyo, e derecho di ser skuchá i derecho riba trato igual. Pa mi esey ta e base for di kual mi kier wak e temanan ku ta al kaso.’

Margrite Kalverboer ta konosé komo profesor èkstra-ordinario pa Mucha, Pedagogía i Derecho di Stranhero na Universidát di Groningen. El a termina e estudionan di Derecho Hulandés, Ortopedagogía y akademia di arte i a promové na 1996 den ‘Gedrags- en Maatschappijwetenschappen’. E ta tuma su tempu promé pa aklimatisá den su trabou. ‘Muchanan Hulandés ta pertenesé na esunnan mas felis di mundo. Pero tin mas i mas ku ta kay pafó di komunidat. Den e añanan ku a pasa a hasi un bon inventarisashon di loke no ta bon, mi kier wak awó kiko nos por hasi ku esey i kon. Mi kier interkambiá idea ku èksperto pero tambe ku mucha.’ Mucha por eksperenshá na edad hoben kaba varios problema. Manera tèrmentu, pobresa òf nan ta den un prosedura di asilo. Òf ku nan mayornan ta divorsiá, vulnerabel òf ku muchanan ta duna ‘mantelzorg’ na nan mayornan. Un pa un, temanan ku ta di gran influénsha riba bida diario di mucha i pa nan futuro.

E Ombudsman pa Mucha ta kontrolá si ta kumpli ku e derechonan di mucha na Hulanda den gobernashon, pero tambe den enseñansa, kuido pa mucha, kuido pa hubentut i kuido di salut. E Ombudsman pa Mucha ta konseha parlamento i organisashonnan i ta hasi hende mas konsiente di derecho di mucha. Di e manera ey e posishon di mucha i hoben na Hulanda ta mehorá. E Ombudsman pa Mucha ta konsehá mucha i hoben enkuanto manera pa nan por para pa nan derechonan. Marc Dullaert tabata te 1 aprel 2016 e promé Ombudsman pa Mucha di Hulanda.