Nationale ombudsman a hustifiká e keho di un habitante di Bonèiru kontra Ministerio Públiko di Bonèiru. Ombudsman ta haña ku Ministerio Públiko mester a rekonosé frankamente ku el a tarda demasiado den tratamentu di e kaso penal kontra e petishonario akí. Anto ku den e kaso akí, Ministerio Públiko a kometé eror i hasi eskohonan robes. Tambe ombudsman ta haña ku Ministerio Públiko no a trata e keho di e petishonario, tokante e manera di traha di Ministerio Públiko, debidamente. Esaki Reinier van Zutphen, e Nationale ombudsman, ta skibi den un rapòrt nobo.
Impakto grandi
E petishonario di e keho kontra Ministerio Públiko boneriano tabata aktivo den polítika lokal. Ministerio Públiko a inisiá un investigashon kontra dje, na momentu ku un fundashon a akusá diferente polítiko di froude i labamentu di plaka. Despues ku Ministerio Públiko a prosedé añanan largu kontra dje, hues a eksoner’é. E manera kon Ministerio Públiko a atendé e kaso penal akí, tabatin i tin un gran impakto riba bida di e petishonario i su famia.
E kaso a tuma lugá durante algun aña i tabata ekstensamente den medionan di komunikashon. Ministerio Públiko a violá privasidat di e petishonario dunando informashon tokante e kaso na e fundashon ku a akus’é. Despues ku a eksonerá e petishonario, Ministerio Públiko durante un entrevista a duna e impreshon ku e apsolushon lo por tabata inhustu. Ombudsman ta haña ku Ministerio Públiko mester a tene kuenta ku e konsekuensianan perhudisial ku esaki lo por tin pa e petishonario. Tambe e ta haña ku Ministerio Públiko mester a koperá mihó na pago di indemnisashon pa e gastunan ku e petishonario tabatin durante e kaso penal.
Diskulpa
Ombudsman ta haña importante pa gobièrnu adoptá un posishon indulgente na momentu ku e ta rekonosé ku a kometé un eror. P’esei e ta konsehá Ministerio Públiko pa pidi diskulpa na e petishonario denter di seis siman. Anto pa buska un gesto apropiá pa ku e petishonario i papia kuné tokante esaki.