Muchu tiki atenshon pa pashèntnan den kasonan di traslado pa kuido médiko

Insufisiente informashon

Pa hopi hende, un traslado pa kuido médiko ta un suseso ku hopi impakto. Nan ta malu, nan ta den un situashon di inseguridat i nan ke haña klaridat tokante di nan tratamentu mas pronto posibel. Di e kòmbersashonnan ku Nationale ombudsman a hiba ku personanan ku tabata enbolbí den un traslado pa kuido médiko, a sali na kla ku frekuentemente e proseso ta bai robes. Solisitutnan sa tuma hopi tempu, e personanan enbolbí no tin bista riba e status di nan solisitut, i no ta motivá e rechasonan sufisientemente.

Nationale ombudsman Reinier van Zutphen: "Hende ku ta malu i mester di kuido médiko, generalmente ta den un situashon vulnerabel. Si ademas nan mester bai otro isla òf otro pais pa tratamentu, esaki ta trese strès adishonal kuné. P'esei ta importante pa informashon tokante di un traslado pa kuido médiko ta sumamente kla."

Muchu tiki konsiderashon pa e nesesidatnan di e siudadano

Banda di esaki, a bin resultá ku na momentu di evaluá e solisitutnan ta tene muchu tiki kuenta ku e sirkunstansianan personal di pashèntnan. Kontakto personal ku trahadónan di Zorg en Jeugd Caribisch Nederland (Kuido i Hubentut Hulanda Karibense - ZJCN) ta kana ku difikultat. Esaki ta preokupante, entre otro konsiderando e echo ku ZJCN ta responsabel tantu pa polítika komo pa implementashon di trasladonan pa kuido médiko.

Nationale ombudsman ta haña ku esaki mester kambia. E ta boga pa mas kontakto personal ku personanan ku ta wòrdu trasladá, pa asina duna mas peso na nan situashon personal i nan nesesidatnan den e proseso di evaluashon. Ademas, lo mester duna trahadónan mas espasio pa desviá for di proseduranan standart ora e situashon ta rekerí esaki. Solamente di e manera ei, tumamentu di desishon por kuadra mihó ku e nesesidatnan di pashèntnan.

Por mehorá e funshonamentu di e prosedura di keho

Ora hende no ta kontentu ku nan traslado pa kuido médiko, hopi biaha nan no sa unda i di ki manera nan por entregá keho. Ademas, hopi hende no ta dùrf pa entregá keho pasobra nan tin miedu ku esaki lo afektá un solisitut futuro.

P'esei, Reinier van Zutphen ta konsehá: "Pèrkurá pa e prosedura di keho ta mas fásil i kla posibel. I no warda pa e kehonan bin despues. Promé, durante i despues di e traslado, puntra hende aktivamente pa nan eksperensianan."