Hopi kuido médiko spesialista no ta disponibel pa siudadanonan di Boneiru, Saba i Sint Eustatius. Pa haña e kuido aki, nan mester biaha bai otro kaminda. Esaki yama traslado pa kuido médiko (medische uitzending) i ta wòrdu reglá dor di direktorado Zorg en Jeugd Caribisch Nederland (Kuido i Hubentut Hulanda Karibense - ZJCN) di Ministerio di Salubridat Públiko, Bienestar i Deporte.
Nationale ombudsman a hasi investigashon, i esaki ta demostrá ku tin tres tópiko prinsipal kaminda siudadanonan di Hulanda Karibense ta eksperensiá problemanan den nan traslado pa kuido médiko. No ta informá nan sufisientemente tokante di nan traslado, no tin sufisiente konsiderashon pa nan nesesidatnan i e prosedura di keho no ta funshoná bon.
Ainda tin keho
Pa hopi aña kaba, Nationale ombudsman ta dediká atenshon na e posishon di siudadanonan di Hulanda Karibense den kasonan di traslado pa kuido médiko. Apesar di esaki, Ombudsman ta sigui risibí keho tokante di e manera ku ta atendé ku trasladonan pa kuido médiko. Esaki tabata motibu pa inisiá e investigashon di e opstákulonan ku siudadanonan di Boneiru, Saba i Sint Eustatius ta eksperensiá ora di bai traslado pa kuido médiko.
Un kaminda largu
A base di e eksperensianan ku siudadanonan i profeshonalnan di kuido a konta Nationale ombudsman, tres tópiko prinsipal a surgi:
No ta informá siudadanonan sufisientemente
Mester mehorá e suministro di informashon na siudadanonan, tantu tokante di e temanan práktiko komo e temanan prosedural di un traslado pa kuido médiko (promé, durante i despues). Siudadanonan ta splika ku ta tuma hopi tempu promé ku nan ta bai traslado pa kuido médiko despues di a referí dor di nan dòkter. Nan no tin bista riba e status di nan petishon ni e transkurso di e proseso i ta informá nan lat ki dia nan mester sali. No ta duna sufisiente motivashon di rechasonan di traslado pa kuido médiko, i siudadanonan no semper ta na haltura di e posibilidat pa entregá opheshon kontra e rechaso.
No tin sufisiente konsiderashon pa e nesesidatnan di siudadanonan
Na momentu di evaluá un solisitut di un traslado pa kuido médiko i na momentu di regla esaki, ZJCN no tin sufisiente konsiderashon pa e nesesidatnan di siudadanonan. Generalmente, e ehekushon efikas i legal di e proseduranan ta determinante. Ademas, pa siudadanonan ta difísil pa drenta den kontakto ku un trahadó di ZJCN ku ta den un posishon pa hasi trabou personalisá. Esaki ta pone ku frekuentemente, siudadanonan no ta sinti ku ta tuma nan na serio ora di ekspresá nan nesesidatnan i preokupashonnan.
E prosedura di keho no ta funshoná bon
E kòmbersashonnan hibá ta demostrá ku hopi siudadano no ta dùrf di entregá keho. Nan ta sinti muchu dependiente di ZJCN i muchu insigur den e relashon. Banda di esaki, siudadanonan no sa kon i unda pa entregá un keho. Si nan logra entregá un keho, siudadanonan no ta kontentu ku e manera ku e prosedura di keho ta funshoná i e resultado final. Finalmente, siudadanonan no semper ta risibí un reakshon riba nan keho. Tin un komishon di keho eksterno, pero e ròl di e komishon aki den e prosedura di keho ta limitá.
Riba tur e puntonan aki, Nationale ombudsman a duna rekomendashonnan na ZJCN pa mehorá e proseso aserka di traslado pa kuido médiko pa siudadanonan.
