Entidat Públiko Boneiru (OLB) no ta informá siudadanonan sufisientemente
Riba é página
Entidat Públiko Boneiru (OLB) no ta informá siudadanonan sufisientemente
Investigashon di Nationale ombudsman ta demostrá ku Entidat Públiko Boneiru (OLB) den vários kaso a keda sin tramitá solisitutnan, petishonnan i kehonan ku diligensia. Proseduranan tabata kana slow i frekuentemente aplikantenan no a risibí informashon, òf e informashon ku nan tabata risibí no tabata sufisiente. E motibu pa e investigashon tabata nuebe keho di largu durashon tokante e manera di traha di Direkshon Espasio i Desaroyo (Directie Ruimte en Ontwikkeling - R&O), di kua algun ta kana pa mas ku dies aña kaba.
E kehonan ta mustra klaramente ku OLB no a informá siudadanonan sufisientemente, i no a tene nan na altura aktivamente tokante di nan solisitut òf petishon. Tin biaha preguntanan tabata wòrdu kontestá ku informashon variabel òf kontradiktorio, i den algun kaso asta no a duna kontesta at all. Entrega di kehonan rara bes a kondusí na klaridat òf un solushon. Segun Ombudsman, esaki tin hopi impakto riba e bida diario di e siudadanonan involukrá.
Nationale ombudsman Reinier van Zutphen: "Mi ta spera ku gobièrnu ta pone e siudadano na promé lugá den su trabou. Mester informá siudadanonan adekuadamente tokante di loke nan por spera di gobièrnu, i ki ora. Esaki ta nifiká ku preguntanan, solisitutnan, i sigur tambe kehonan, mester wòrdu tumá na serio i mester atendé nan ku diligensia."
Apesar ku Ombudsman ta komprondé ku tin sirkunstansianan ku ta kompliká ehekushon di tareanan pa OLB, e no ta haña ku esaki mag ta un hustifikashon pa e echo ku no ta informá siudadano òf ta informá nan muchu lat. E ta spera ku OLB ta trata petishonnan lihé i kuidadosamente, i ta informá siudadanonan na tempu i di manera kla, pa mantené konfiansa.
