> The report is available in Dutch
Nationale ombudsman a investigá nuebe keho di largu durashon tokante di Direkshon Espasio i Desaroyo (Directie Ruimte en Ontwikkeling) di Entidat Públiko Boneiru (OLB). Tur e kehonan ta trata di un falta di klaridat tokante di e tramitashon di nan solisitut òf petishon. Shete siudadano a entregá un solisitut serka OLB pa un pida tereno – den erfpacht òf tereno di hür – pa ophetivonan residensial òf komersial. Dos siudadano a hasi un petishon pa motibu di (mal) mantenshon di kaminda públiko pa yega na nan kas òf tereno.
OLB no a duna e siudadanonan aki informashon kla tokante di e manera ku lo tramitá nan solisitut òf petishon. P'esei, nan tin hopi tempu sin sa kiko ta bai pasa. Esaki tin hopi impakto riba nan bida i nan plannan pa futuro. Ku e investigashon aki, Ombudsman ke sòru ku ta bira kla kiko siudadanonan por spera di OLB. Ombudsman tambe ke pèrkurá pa e servisionan di OLB sigui mehorá, pa asina evitá ku otro siudadanonan ta haña nan ku e mésun problemanan.
A base di e investigashon, Ombudsman ta haña ku e kehonan ta fundá. E ta konkluí ku OLB no a aktuá debidamente, pasobra no a tramitá e solisitutnan i petishonnan ku diligensia. Banda di esaki, no a informá e siudadanonan adekuadamente, ni tampoko a tene nan na altura di e tramitashon di nan solisitut òf petishon. Ora e siudadanonan mes tabata tuma kontakto ku OLB pa hasi nan preguntanan, tampoko a duna nan klaridat. E reakshonnan ku nan a haña tabata varia. Den algun kaso, nan no tabata haña reakshon, òf a haña un reakshon muchu lat. Pero tambe a duna nan informashon inkompleto, inkorekto òf kontradiktorio. Ora di entregá un keho serka OLB (pa medio di Ombudsman) no a yega na un solushon i/òf klaridat.
Komo ku e siudadanonan mester warda hopi pa nan solisitut òf petishon wòrdu tramitá, i no ta dunando nan klaridat tokante di loke nan por spera di OLB, nan no ta sinti ku ta tuma nan na serio. I p'esei tin ménos konfiansa den OLB.
Ombudsman ta komprondé e sirkunstansianan difísil – manera e falta di personal i e echo ku e poblashon ta krese lihé – ku ta kompliká e tareanan di ehekushon di OLB. Posiblemente, e sirkunstansianan aki ta parti di e splikashon, pero Ombudsman no ta haña ku e sirkunstansianan aki por hustifiká un falta di bon suministro di informashon i falta di diligensia.
Ombudsman ta spera di gobièrnu, pues tambe di OLB, ku e tin su asuntunan na òrdu i ta laga e siudadano para sentral. Esaki ta nifiká ku preguntanan i solisitutnan, pero tambe kehonan di siudadanonan, mester wòrdu tumá na serio i mester atendé nan ku diligensia. I ku ta informá siudadanonan adekuadamente tokante di loke nan por spera di gobièrnu, i ki ora.
Esaki ta nifiká konkretamente ku OLB ta tramitá un solisitut, petishon òf keho mas pronto i mas efisiente posibel. Ta informá siudadanonan aktivamente tokante di e manera i e plaso di tramitashon. I ku siudadanonan ta haña un konfirmashon ku a risibí nan solisitut, petishon òf keho, ku informashon tokante di e plaso di tramitashon i e departamento i/òf trahadó responsabel. Si no logra tramitashon denter di e plaso, OLB mester manda un mensahe interino den kua ta splika e motibunan di e retraso i un plaso nobo denter di kua lo tuma un desishon òf lo duna un reakshon. Ademas ta importante pa OLB sòru pa registrashon adekuá i monitoreo di e progreso di tur solisitut, petishon i keho.
Ombudsman ta haña ku esaki ta e mínimo ku siudadanonan mag spera ora di entregá un solisitut òf petishon, òf ora di pidi pa klarifikashon òf entregá un keho tokante di e forma ku asuntunan ta kana.