Ombudsman: Mester di un gobièrnu proaktivo pa restorá konfiansa

Debí na su aktitut pasivo, gobièrnu ta pèrdè kontakto ku siudadanonan, i di e manera ei, nan konfiansa. Ademas, e maneho no semper ta yega na tur siudadano.

No ta ignoransia, ta pasividat 

Un gobièrnu ku tei pa tur siudadano no tin aktitut pasivo, sino un aktitut ku ta mira pa futuro. Segun Nationale ombudsman Reinier van Zutphen, hopi biaha ta konosí pa hopi tempu kaba ken mester di yudansa, pero no ta tuma akshon. Debí na esei, hopi hende no ta hasi uso di areglonan ku nan tin derecho riba dje. "Si bo sa di ken ta trata i kon pa yuda e grupo ei, bo deber ta pa traha riba esei."

E redukshon di gastunan proyektá pa gabinete riba e plan pa aktivamente aserká personanan ku ta pèrdiendo ònderstant, ta un ehèmpel di esaki. Anteriormente den e aña aki, Van Zutphen ya kaba a papia di esaki krítikamente. "Ta presisamente e grupo aki ta esun ku mester di mas apoyo. Nan meresé un gobièrnu ku ta buska nan en bes di keda warda." 

Apesar ku a kanselá e redukshon di gastunan, segun Ombudsman e manera di aktuá ta bisa hopi di e aktitut di gobièrnu: "E gabinete aki ta aselerá pero na mes momentu ta wanta brek. Di e manera ei no ta yuda niun siudadano."

Un gobièrnu proaktivo mester ta e norma

Pa restorá konfiansa, segun Van Zutphen mester di kambionan fundamental. P'esei, huntu ku e relato anual, e ta presentá un Vishon di Ombudsman riba Gobièrnu Proaktivo (Ombudsvisie Proactieve Overheid), komo guia pa e gabinete nobo.

Den e vishon aki e ta boga entre otro pa otorgamentu outomátiko – si ta posibel – di pagonan i sobrekarganan, redukshon di gastunan atministrativo i suministro di mas seguridat na siudadanonan. Pèrkurando, por ehèmpel, pa no kanselá apoyo otorgá sin mas. Den e marko ei, garantianan manera privasidat mester wòrdu mantené.

Van Zutphen: "Un gobièrnu adekuá no ta keda warda te hende pèrdè kaminda den un selva di lokèt, sino ta buska nan ora e sa ku nan mester di apoyo. Brinda servisionan proaktivo no mester ta un eskoho, sino e norma. Esei ta e úniko manera pa bai dilanti."

No ta dediká atenshon na siudadanonan vulnerabel 

Maneho ku no ta alkansá tur hende, ta oumentá desigualdat. Tijdelijk Noodfonds Energie (TNE), ku na 2025 a ser habrí pa di tres biaha, ta demostrá esei. Solamente esnan ku DigiD i sufisiente habilidatnan digital por a entregá un solisitut. Ademas, e presupuesto disponibel no tabata basá riba e tamaño di e problema, sino riba e kontribushon di e kompanianan di energia. 

Segun Ombudsman, esaki tabata nifiká ku a keda sin dediká atenshon presisamente na e gruponan mas vulnerabel. Debí na e insiguridat persistente tokante di preisnan di energia, e problema aki ta kontinuá den e aña 2026. Van Zutphen ta urgi gabinete pa hasi e fondo aksesibel na tur hende e biaha aki sí. I asina hasi loke ta nesesario.

25.000 señal: atenshon pa aktuashon adekuá 

Na 2025, e Ombudsmannan a risibí 25.000 keho i señal. Esakinan a demostrá ku aktuashon adekuá di gobièrnu no ta evidente, sino e ta rekerí un empeño diario: na telefòn, na bali, ora di traha maneho i na momentu di hasi eskohonan polítiko ku hopi impakto.

Pa apoyá gobièrnunan den e proseso aki, na kuminsamentu di e aña aki, Ombudsman a introdusí un Behoorlijkheidswijzer renobá ku kuater balor klave: bon kontakto, hasi loke ta nesesario, traha pa tur siudadano i aktuá di manera hustu. "Bon kontakto ta e fundeshi," e ta enfatisá. "Sin esei, restorashon di konfiansa ta keda un promesa solamente riba papel."