Relato anual 2024: Pone e siudadano na promé lugá

Na 2024, 27.000 siudadano, mucha i veterano a pidi yudansa di Nationale ombudsman, Ombudsman pa mucha i Ombudsman pa veterano. Un oumento kompará ku e aña anterior. Lo por a evitá hopi di e kehonan si gobièrnu lo a skucha señalnan di sosiedat mas promé.

Involukrá esnan konserní

P'esei, na 2024, Ombudsmannan a urgi gobièrnunan pa skucha siudadanonan i involukrá nan na momentu ku ta traha leinan i regulashonnan. Meskos ta konta pa organisashonnan di implementashon. No ta probechá sufisientemente nan konosementu tokante di loke ta traha bon den práktika. E konsekuensia: maneho ku ta afektá hende, sin ku a involukrá nan. 

Manera transporte di studiante ku no ta kuadra ku e nesesidatnan di muchanan ku limitashon. Òf munisipionan ku ta tilda siudadanonan emoshonal di 'agresivo' i ta kibra kontakto sin investigá for di unda e komportashon aki ta sali. Konsehonan di instansianan ku mester protehá estado di derecho, tampoko ta wòrdu tuma na serio. Manera den e kaso di legislashon di asilo nobo. Esaki ta kulminá den gobernashon inadekuá.

Nationale ombudsman Reinier van Zutphen: "Ora no ta tende señalnan di sosiedat, implementashon ni supervishon, òf konsientemente ta ignorá nan, siudadano ta esun ku ta paga e preis. Un estado di derecho no ta protehá su mes. Ta rekerí un gobièrnu ku ta skucha strukturalmente i ta tuma desishonnan bon konsiderá."

Bista públiko ta mas importante ku siudadano

Segun Ombudsmannan, ta parse ku efektivamente yuda hende no ta na promé lugá den e debate polítiko. “Proyektonan di lei, moshonnan i amiendanan ta mas dirigí riba bista públiko ku riba e siudadano. Promesanan irealístiko ta krea deskonfiansa i ta debilitá konfiansa den gobièrnu, spesialmente bou di esnan pa kende e plannan ta intenshoná."

Por ehèmpel, tin plannan pa mihó aksesibilidat di servisionan, pero no ta hasi invershonnan struktural den organisashonnan di implementashon ni munisipionan. I apesar ku a primintí pa kompensá generosamente esnan perhudiká pa e skandal di toeslagen, mayornan awor ta warda un promedio di 78 siman pa haña kontesta riba nan opheshon. Pa desénas di míles di mayor, ainda no tin solushon.

Rekonosé fayonan, i drecha nan

Ombudsmannan ta rekonosé ku Gobièrnu nunka lo ta sin fayo. Pero kaminda ta bai robes, komo siudadano bo mag spera ku gobièrnu ta rekonosé i ta drecha esaki. Pero tòg esaki ta bai robes frekuentemente. Na 2024, Nationale ombudsman a emití su di tres rapòrt tokante di pashèntnan di Keintura Q. Ainda nan ta warda riba diskulpa, rekonosementu i yudansa. Apesar di petishonnan reiterá di Ombudsman, 15 aña despues, ainda no a pidi diskulpa.

Tambe tin ehèmpelnan positivo. Dienst Uitvoering Onderwijs (DUO), por ehèmpel, a rekonosé ku un algoritmo tabata perhudiká studiantenan ku un pasado di migrashon na momentu di hasi kòntròlnan riba bekanan di studiantenan ku tabata biba riba nan mes. DUO a pidi diskulpa i ta traha riba un kompensashon. Pues sí ta posibel: trata hende di manera hustu. "Sinembargo, realisashon di bo derechonan no ta algu ku bo mester meresé promé. Òf haña numa ora kos a bai robes", e Ombudsmannan ta skirbi. "Gobièrnu semper mester trata tur hende ku desensia. Asta si no ta kuestion di kulpa (honorario) òf reparashon."

‘Silensio profundo’

Pa di dos aña konsekutivo, Nationale ombudsman awe ta entregá e relato anual na Parlamento den un periodo demisionario. Miéntras e siudadanonan ta anhelá solushonnan, Gabinete ta pará na banda i polítika ta espektador. Kuater aña pasá, Van Zutphen a papia di un silensio demisionario despues ku Gabinete Rutte III a kai. Awor, e ta huzga mas severo: "E último dos añanan, e silensio realmente tabata profundo."

Segun Ombudsman, gobièrnu ta laga siudadanonan sigui lucha nan so. "E skandal di toeslagen no tin fin, e fortalesementu di Groningen tin retraso di kuater aña i ta kombatí e pobresa di energia ku fondonan di emergensia. No tin solushonnan struktural, miéntras hende tin derecho riba gobernashon honesto i efikas." Van Zutphen ta urgi polítika: "Skucha loke hende tin mester, sea honesto tokante di kiko gobièrnu por i no por, i e kos di mas importante: hasi loke bo ta primintí. A yega ora pa tuma responsabilidat i pa aktuá, pa e siudadanonan di awe i e siudadanonan di futuro."