“Trabou na midí por evitá masha hopi sufrimentu”

Riba é página

    Bo Aarsbergen, Michelle Wolthers and Ernst Radius

    Profeshonalnan ku ta asistí siudadano tin un funshon di señal importante pa Nationale ombudsman di loke ta pasa den komunidat. Kiko nan ta topa kuné? Kon nan ta eksperiensiá e diferensia ku tin entre gobièrnu i siudadano? Anto kiko nan por siña di otro i di e ombudsman? Un relato di un kòmbersashon online entre tres profeshonal entusiasmá.

    Relashon gobièrnu-siudadano

    E asina yamá toeslagenaffaire ta prueba ku kos por sali fo’i man entre gobièrnu ku siudadano. Den e toeslagenaffaire 26.000 mayor inhustamente a keda akusá di a kometé froude ku kinderopvangtoeslag. Ernst Radius, konsehero di asosiashon Sociaal Werk Nederland, ta haña e eskala di e kaso aki notabel, pero e no ta sorprendé.

    “Miembro di konseho munisipal sosial regularmente ta haña señal di siudadanonan tokante konflikto ku e instanshanan gubernamental ehekutivo. Partikularmente for di ku na 2015 gobièrnu a pasa e tareanan pa munisipionan, e kantidat di keho a subi di manera remarkabel.”

    Sistema versus trabou na midí

    Komo punto doloroso mas importante e ta menshoná e infleksibilidat di e ‘sistemanan’ den kua hende ta kai aden. Señor Radius: “Ta kasi imposibel una bes ku un kliente ta den sierto sistema, pa hasi un trabou na midí. Riba su mes ta lógiko ku tin regla i sistema fiho pa toeslagen, pero denter di esei, semper bo mester por hasi eksepshon. Trabou na midí por evitá masha hopi sufrimentu serka hende.”  

    Den esaki Michelle Wolthers, ku ta persona di konfiansa na Advies- en Klachtenbureau Jeugdzorg, ta enfatisá e diferente maneranan di traha entre ausiliarnan i organisashonnan gubernamental. “Na AKJ hustamente nos ta gusta wak e kliente di manera individual: ta kiko e persona espesífiko ei tin mester pa haña konfiansa bèk den e instansha ku kua e tin problema.”

    Banda di esei konsehero na Stichting Lezen en Schrijven, Bo Aarsbergen ta topa siudadano ku regularmente ta pèrdè kaminda den e proseso na instanshanan gubernamental. “Sistemanan ta hinká den otro sin wak si esei ta realmente nesesario, anto pa ken e ta keda hasí. Hende ta pèrdè kaminda, no ta tuma e pasonan korekto i kai for di e sistema. E ora ei gobièrnu por keda simplifiká karta eternamente, pero si e siudadano no komprondé loke ta fèrwagt di dje, kos ta bai robes. Ademas ami no ta kere ku ámtenar konsientemente ke amargá hende su bida.” Señora Bo ta agregá. “Pero un poko mas di atenshon i empatía lo yuda enormemente.”

    E siudadano outosufisiente

    Hopi problema ta relashoná ku e idea di e ‘siudadano outosufisiente’. Señor Ernst Radius ta bai bèk na aña 2005, e aña den kua a introdusí Algemene wet inkomensafhankelijke regelingen. “Gobièrnu a ideá ku e siudadano mes ta responsabel pa su propio entrada i ku e mes mester bai regla esei. Pero pa asumí ku hende realmente por regla esei, sí tabata un kibukashon. Bo por fèrwagt ku hende sa sí, pero esei no ke men ku nan por òf ta hasié realmente tambe.”

    Bo Aarsbergen ta agregá: “Banda di esei ta importante ku ta surgi un kultura den kua ta normal ku bo ta indiká si bo no ta komprondé algu òf tin mester di ayudo. Aworaki tin hopi hende ta resistí pa hasi esei.”

    Michelle Wolthers ta splika: “Frekuentemente nos klientenan tin di aber ku medidanan ku ta intervení den nan bida familiar. Nos por yuda ku skirbimentu di un karta di keho i tene un kòmbersashon. Parando banda di nos klientenan, nos ta yuda nan pa nan por ekspresá di kiko realmente ta trata.”

    Koperashon di profeshonalnan

    Frekuentemente serka hende ku ta pegá, ta trata di akumulashon di problema. E ora ei nan tin de aber ku diferente instansha ku ta ousiliá. Sigun Bo Aarsbergen e koperashon entre e instanshanan lo por ta mihó. “Lo ta bon pa haña un mihó bista di e biahe ku e klientenan ei mester hasi serka tur e organisashonnan. Aworaki nos no tin sufisiente konosementu di tur e pasonan ku un kliente a pone kaba na otro instanshanan ku ta ousiliá.”

    Michelle Wolthers: “Serka nos ta mas bien kontrali. Un dosié ta bai ku e kliente di un instansha p’e otro. Esei por ehèmpel por kuminsá na e tim di bario i yega te na e hues di menor. Pero si un rapòrt asina, den wowo di e kliente no ta korekto, ta surgi un mira inkorekto riba e situashon anto esaki no ta kambia mas den hinter e proseso. Ta masha difísil pa hasi un kambio den esaki.”

    “Koperashon ta algu ku ta den e DNA di miembronan di konseho munisipal sosial.” Ernst Radius ta bisa. “Pero alabes esaki ta difísil tambe, pasó bo tin di aber ku hende ku mester traha e ‘hárnas’ di nan mes organisashon. Esei frekuentemente ta limitá e empleadonan den e posibilidatnan di loke nan ta pèrmití i no ta pèrmití di hasi.”

    Koperashon ku Ombudsman

    Kiko e profeshonalnan akí ta haña di nan koperashon ku Nationale ombudsman?

    Michelle Wolthers: “Semper AKJ ta referí klientenan ku ta keda malkontentu ku e manera ku a trata nan keho na un instansha gubernamental, na Ombudsman. Lo ta bon si e instanshanan ei lo integrá e vishon di Nationale ombudsman riba trato di keho profeshonal  den nan manera di traha. Al final un keho tambe ta algu pa siña f’oi dje. Nos ta ripará ku esaki no ta keda mirá asina semper.”

    “Banda di esei e rapòrtnan di Ombudsman ta masha balioso pa nos i nos ta koperá ku investigashonnan di Kinderombudsman. Tambe na nivel di maneho, regularmente tin kontakto entre AKJ i Ombudsman.”

    Ernst Radius ta sekundá esei. “Miembronan di konseho munisipal sosial, ku ta traha lokalmente, ta manda hende pa Nationale ombudsman na momentu ku nan ta kere ku esei ta e úniko manera pa haña solushon. Banda di esei tin un konsehero di Nationale ombudsman presente durante di nos deliberashon nashonal. Ei regularmente nos ta deliberá ta kua señal nos ta risibí for di práktika. Ombudsman tambe ta puntra nos si nos ta mira tema ku nan por investigá mas a fondo.”

    Pa Stichting Lezen en Schrijven e rapòrt- i konsehonan di Ombudsman ta hopi importante. Bo Aarsbergen ta bisa: “Ku esakinan mi ta pará mas fuerte na momentu ku mi ke pidi un munisipio atenshon na un grupo na bista.”