Un dama tin hopi aña ta eksperensiá molèster di ekskavashon ilegal di tera ku diabaas rondó di su kas. Diabaas ta un materia prima nesesario pa traha kaminda i konstruí kas. Pa hopi aña, no tabata tin polítika pa ekstrakshon di diabaas. E ekskavashon di diabaas ta krea burakunan profundo ku despues ta basha sushi den dje ilegalmente. E dama ta mèldu e molèster serka Directie Toezicht en Handhaving (Direkshon Supervishon i Enforsamentu – T&H) di Entidat Públiko Boneiru (OLB). E ta entregá keho serka Ombudsman tokante di e manera ku OLB a trat'é.
Ombudsman ta huzga ku e aktuashon di T&H no tabata adekuá. T&H no a tuma inisiativa pa investigá – den kolaborashon ku otro Direkshonnan/Kolegio Ehekutivo di OLB – kiko tabata posibel den e situashon aki. Ademas, Ombudsman no ta haña adekuá ku T&H a kalifiká e solisitut di e dama pa haña daño i perhuisio komo asuntu di derecho privá, ku e no por akudí na T&H kuné. Di e manera aki, OLB a aktua kontrali na e rekisitonan di koperashon i aktitut fleksibel. P'esei, Ombudsman ta haña ku e keho di e dama ta fundá, i e ta hasi un rekomendashon na OLB. E ta rekomendá OLB pa bini ku un proposishon konkreto reakshonando riba e solisitut di daño i perhuisio di e dama, denter di tres luna despues ku e rapòrt ta bira públiko.
