No tin sufisiente mehora pa hende na Hulanda Karibense ku ta biba den pobresa. Apesar di señalnan anterior, no ta hasi sufisiente pa redusí e problemátika di pobresa na Hulanda Karibense. Gobièrnu mester duna paso awor, i bini ku un pakete total di solushonnan ku ta yuda hende duraderamente. Asina Nationale ombudsman i Ombudsman pa mucha ta skibi den nan rapòrt di reflekshon 'De eindjes aan elkaar knopen'. Esaki ta nan retrospektiva riba tres investigashonnan anterior di pobresa na Hulanda Karibense.
Lanta den pobresa
Lanta den un famia ku ta biba den pobresa sa tin hopi efekto riba bida diario i e desaroyo di mucha. E ta kousa hopi strès pa tur miembronan di famia, i e tin influensia riba kriansa. Mayoria di e famianan den pobresa ta bou di hopi preshon, loke ta pone ku tin tiki tempu i trankilidat pa e kriansa di muchanan. Komo konsekuensia, tin mas probabilidat – entre otro – di abandono eskolar di e muchanan aki.
Mester di mas ku solamente sèn èkstra
Nationale ombudsman i Ombudsman pa mucha ta ripará ku ainda no ta aktuá sufisientemente pa mehorá e situashon di hende den pobresa na Hulanda Karibense. E problemanan ku hende ta eksperensiá sa bai mas aleu ku problemanan finansiero so. Tambe ta trata di bon alohamentu, enseñansa, kuido i apoyo sosial. Apesar ku gobièrnu ta bai di akuerdo ku e rekomendashonnan i konklushonnan di e tres rapòrtnan anterior di e Ombudsmannan, e ta tarda demasiado pa pone man na obra konkretamente ku esakinan.
Mester kibra e sírkulo di pobresa
E kombatimentu di pobresa na Hulanda Karibense ta rekerí un intervenshon lihé. Nationale ombudsman i Ombudsman pa mucha a ripará ku solushonnan anterior mayoria biaha tabata pa término kòrtiku. P'esei, ta importante ku awor gobièrnu ta bini ku solushonnan duradero pa kibra e sírkulo visioso di pobresa. E Ombudsmannan ta enfatisá ku ta krusial pa desaroyá e solushonnan huntu ku e habitantenan (grandi i chikí) di Hulanda Karibense. Den e marko aki, ta importante pa tene kuenta ku e diferensianan kultural, e eskala chikí di e islanan i e falta di konfiansa ku ta eksistí pa ku gobièrnu.
