Ombudsplein: kaminda Nationale ombudsman su kurason ta bati

Riba é página

    Coworker of the National ombudsman on the phone at the 'Ombudsplein'

    Na momentu ku un siudadano tuma kontakto ku Nationale ombudsman mésora e ta drenta e asina yamá Ombudsplein (plenchi di e defensor di pueblo). Aki tin un tim di profeshonalnan ku ta mashá uní i nan ta trata keho. Bo por rekonosé nan na dos karakterístika: nan por skucha bon, anto nan no ta pensa den problema pero den solushon. Tira un bista den e sentro neurálgiko di e defensor di pueblo na Den Haag.

     Anualmente tin mas o ménos 25 mil pregunta i keho ta drenta serka Nationale ombudsman. Ta trata aki di keho tokante munisipionan òf ministerionan, pero tambe tokante instanshanan manera UWV, Belastingdienst òf Polis. Empleadonan na Ombudsplein ta evaluá tur e kehonan akí promé.

    Personanan ku tin un pregunta òf keho tin kontakto direktamente ku un persona ku ta trata keho. Esei por ta pa medio di e website òf na telefòn. Na e website tin kontesta riba preguntanan ku mas sa keda hasí, anto esakinan ta yuda e bishitante mésora pa e yega mas aleu.

    Na telefòn tambe esnan ku ta manehá keho ta dirigí pa haña solushon. Asta na momentu ku un pregunta òf keho no tin di aber ku gobièrnu, Nationale ombudsman ta purba di yuda e siudadano. E ta hasi esaki dor di indiká ta kua lokèt e siudadano mester tuma kontakto kuné.

    Esnan ku ta manehá keho

    E personanan ku ta manehá keho na Ombudsplein ta traha den gruponan spesialisá. Pues no ta importá na kua porta un hende ta bati, na ombudsman semper e ta haña un persona ku tin konosementu di e materia. Algun di e spesialisashonnan ta entre otro: impuesto, toeslagen, polis, mobilidat i kuido.

    For di nan ekspertisio i eksperiensha empleadonan di Ombudsplein konosé e problemátika di esun ku ta hasi un pregunta. Na mayoria di e órganonan di gobernashon e empleadonan di Ombudsplein tin un persona di kontakto fiho. Pues ta drenta den kontakto ku nan lihé. Esaki realmente ta yuda na momentu ku mester por solushoná un keho òf kontestá un pregunta lihé.

    Corona

    Durante e pandemia di Corona Ombudsplein a keda habrí. E tim ku ta atendé yamada na telefòn tabata aksesibel semper. For di tur skina di Hulanda a drenta hopi keho ku a surgi a konsekuensha di e medidanan kontra Corona. Tabatin keho entre otro tokante e kontribushon propio di Wmo. Tambe empresarionan chikí a buska ayudo mas biaha serka ombudsman.

    Normalmente tur empleado di Ombudsplein ta sintá huntu na ún departamento. Pero durante e pandemia di Corona kasi nan tur ta traha na kas.

    Un di nan ta Mohamad Alhadjri: “Uniko kos ku for di Corona realmente a kambia pa nos ta ku nos no ta wak otro en persona mas. Pa loke ta trata trabou, nos por hasi tur kos for di kas, méskos ku na kantor. Nos tim di ict a instalá tur kos perfektamente na nos kas. Den e aña ku a pasa nos tabata perfektamente alkansabel di manera digital i via telefòn. E personanan ku a tuma kontakto ku nos a apresiá esei.”

    Kontribushon propio di Wmo i Wlz

    Durante e promé ola di Corona, Nationale ombudsman a risibí diferente keho tokante kobramentu di kontribushon propio di Wmo i WIz. Durante primavera di 2020 (kasi) no tabata posibel pa duna kuido i apoyo di un manera normal. Hopi hende no tabatin klaridat tokante kobramentu di e kontribushon propio di Wmo pa e lunanan den kua nan no a haña kuido.

    Tambe tabatin hopi keho tokante e echo ku nan mester a paga un kontribushon propio di WIz (haltu), mientras ku nan a haña ménos kuido (o asta no a haña kuido), anto p’esei nan mantelzorger tabatin mas trabou pa hasi. Ku motibu di e kehonan akí ombudsman a pidi ministro di VWS pa mas klaridat.

    Empresarionan

    Banda di esaki ombudsman a risibí hopi keho tokante e areglonan di apoyo di emergensia ku gobièrnu tabatin pa empresarionan. Partikularmente zzp’ernan, ku pa motinu ku riba papel nan no ta kumpli ku sierto kondishon, tabata parse di lo keda un man pa’lanti, un man patras. Tambe tabatin keho tokante e rapides ku kua, tin biaha tabata dekliná petishon pa apoyo di emergensia. Al final mayoria di zzp’er a logra haña areglo adekuá. Durante e di dos ola tabatin notablemente ménos keho.  

    Pa evitá ku hende innesesariamente lo bai kai den mas debe, Nationale ombudsman na diferente momentu durante e krísis di Corona, a pidi gobièrnu pa trata kobramentu di debe debidamente, sigur ora ta trata empresarionan chikí i hende ku tiki rekurso.

    Gratitut

    Mohomad AlhadjriMohamad Alhadjri (40) ya tin 15 aña ta traha tratando keho na Nationale ombudsman. El a studia Management, Economie en Recht na Haagse Hogeschool. Na Ombudsplein e ta enkargá prinsipalmente ku keho i pregunta tokante impuesto i toeslagen. Na 2017 el a forma parti di e tim di investigashon ku tabata responsabel pa e rapòrt di  kinderopvangtoeslag yamá ‘Geen powerplay maar fair play’.

    Ya for di 2006 bo ta traha na Nationale ombudsman. Kiko ta loke ta atrahé bo mas tantu di bo trabou?

    “E impakto sosial di e trabou ku bo ta hasi akí. Miles di persona literalmente ta benefisiá di nos investigashonnan i e rapòrtnan ku rekomendashon ku nos ta skirbi pa ministerionan.”

    Kua karaktetístika bo mester tin pa trata keho?

    “Na promé lugá hende tin mester di un persona ku realmente ta skucha. Pero finalmente ta trata di e kontenido di un pregunta òf keho. E ora ei ta importante ku esun ku ta yama tin un persona na liña ku konosementu di e materia.”

    Nationale ombudsman tei pa keho tokante akshonnan gubernamental indebí. Ta na ki momentu esei ta e kaso?

    “Ombudsman a skirbi un asina yamá Behoorlijkheidswijzer. Den sierto sentido esaki ta forma un tipo di kódigo di komportashon pa gobièrnu. Den esaki nos tin kuater punto di salida: gobièrnu mester ta habrí i kla, respetuoso, komprometí i orientá pa haña solushon, anto finalmente gobièrnu mester ta sinsero i konfiabel. Ku esaki komo midí nos ta evaluá kada keho. Durante esaki bo mester pone bo mes den posishon di e siudadano, keda wak for di su perspektiva.”

    Huntu ku dos kolega na 2017 bo tabata responsabel pa e investigashon tokante kinderopvangtoeslag. Kon boso e tempu ei a dil ku esaki?

    “Nos a subi kaya. Nos a papia ku Belastingdienst/Toeslagen, ku e direktor di e ofisina pa mayor-anfitrion, kaminda mayornan tabata hasi nan petishon pa krèsh i/o akohida pa nan yunan. Tambe nos a papia ku e abogado ku tabata representá algun di e perhudikadonan. Seguidamente nos a hasi Belastingdienst algun pregunta ku finalmente a indusí na nos rapòrt titulá ‘Geen powerplay maar fairplay’ (‘No powerplay pero fairplay’). E echo ku polítika, stipuladó di maneho i otronan komprometí ainda ta referí nan nos rapòrt, ta mustra ku Nationale ombudsman ta desempeñá un funshon importante den esaki.”

    Kon bo ta ripará ku hende ta kontentu ku bo a yuda nan?

    “Bo ta sinti e gradesimentu dor di e liña di telefòn. Tambe frekuentemente nan ta manda un bukèt di flor òf un bolo. Pues hende ku ta kontentu ku nos a solushoná nan problema. Mayoria di biaha ta hende grandi ta mustra nan apresio di e manera akí. Nos ta apresiá esei mashá.”