2021/047 Na promé instansha Zorgverzekeringskantoor Boneiru no ta duna siudadano un chèns hustu

Rapportnummer
2021/047
Rapport

> Riba e página aki bo por lesa e raport na hulandes

E kabayero a keha serka Nationale ombudsman ya komo ku e no ta di akuerdo ku e reakshon di Zorgverzekeringskantoor na Boneiru (ZVK).

E kabayero a wòrdu operá dos biaha na Hulanda Europeo pero el a keda ku keho di salú. Pa e motibu ei el a bai bèk serka e spesialista. E ta keha tokante e echo ku ZVK no ta reembolsá e kontròl despues di e operashonan akí. Anterior na e promé operashon e kabayero a pidi ZVK pèrmit pa kubri e gastunan. ZVK a duna garantia pa esaki i a paga e operashonnan. Pero e kontròl despues di e operashon no tabata kai bou di e garantia i p’esei e kabayero mester a pidi pèrmit di nobo. E dòkter di kas di e kabayero a hasi esaki. ZVK no a duna pèrmit ya komo den e petishon nobo no tabatin e oferta di e kabayero. Pa e motibu akí ZVK no a paga e kuenta di e spesialista. E kabayero no tabata di akuerdo ku esaki, anto el a oponé kontra esaki. E no tabatin oferta ya komo e spesialista ainda no tabata sa kiko e problema tabata. Ademas el a pensa ku ta lógiko ku lo paga e kontròl tambe. ZVK a mantené su punto di bista i a splika dikon nan no a paga e faktura.   

Nationale ombudsman a konkluí ku ZVK no a duna e kabayero e chèns pa kompletá e petishon. Nationale ombudsman ta haña ku ZVK a aktua kontra e prinsipio di fair play, dor di no duna e kabayero e chèns pa kompletá su petishon. Nationale ombudsman ta deklará e keho fundamentá. 

Nationale ombudsman ta kontentu di tende ku ZVK ta bai paga e kabayero bèk. Retrospektivamente pa motibu di e sirkunstanshanan espesífiko e kaso akí tabata trata di un situashon imprevisto. Tambe Nationale ombudsman ta kontentu di tende ku den futuro ZVK ta bai tin mas atenshon pa komunikashon ku siudadano, anto pa skucha e siudadano durante un prosedura di keho.

Keho:

Un kabayero ta keha tokante e echo ku ZVK no ke reembolsá un tratamentu serka un spesialista. Tambe e ta keha tokante e echo ku e no por bringa esaki mas aleu.

Sentesia: fundamentá