Ombudsman ta mira mehoranan den e situashon di studiantenan karibense ku ta bin studia Hulanda. Asina por ehèmpel tin mehora den e preparashon i e guia di e studiantenan. Tambe ta asina ku entretantu mayoria di e studiantenan ta bini na remarke pa un seguro básiko pa kuido hulandes i zorgtoeslag. Ombudsman sigur ta mira ku por drecha mas kos ainda. Awe el a publiká su hayasgonan mas resiente den un informe final. Awor e ta pasa su tareanan ofer, i e ta hasi un yamamentu na e Regiegroep Studiesucces Caribische Studenten pa traha huntu i sigui drecha e situashon pa e studiantenan.
Na aña 2020, Nationale ombudsman a investigá e problemanan ku studiantenan di e parti karibense di rèino ta haña ora nan ta bin studia na Hulanda. El a konstatá ku dunamentu di informashon i guia di e studiantenan tabata mal reglá. Tambe tabata asina ku promé ku nan bin Hulanda, nan no tabata haña nan Burgerservicenummer (BSN). Sin BSN, nan no por a habri un kuenta di banko, por ehèmpel. Banda di esaki, ni maske nan tin un pasport hulandes, nan no por a hasi uso di seguro básiko pa kuido hulandes. P’esei nan no tabata bini na remarke pa haña zorgtoeslag. E studiantenan mes tabata kere ku nan sí tabata bini na remarke pa esaki i tabata hasi petishon pa haña e toeslag tòg. Debí na esaki, despues nan tabata haña nan mes den problema finansiero ya komo nan mester a paga e toeslag aki bèk. Komo último, ombudsman a konstatá ku tabatin problema pa loke ta trata pagamentu bèk di e debe di estudio una bes e studiantenan tabata bai nan isla bèk. Esaki tabata fuente pa retonan finansiero grandi i problemanan pa e studiantenan karibense.
Ombudsman ta enfoká riba mehora
Den e rapòrt titulá ‘Dolor di kabes di studiante karibense’, ombudsman a presentá diferente rekomendashon. Pa evitá ku su rapòrt lo bai pèrdí den un lachi, el a traha duru pa monitòr i persiguí e mehoranan nesesario. Nationale ombudsman Reinier van Zutphen: “Studiante karibense ta enfrentá tur sorto di problema ku studiantenan ku a nase na Hulanda no tin. Esei ta algu inhustu i perhudisial. Pues ami huntu ku mi koleganan e último añanan a pone di nos parti pa sòru ku e problemanan di studiantenan karibense ta wòrdu solushoná mas pronto ku ta posibel.” Entre otro, ombudsman a hasi un yamamentu na e ministronan envolví pa nan tuma akshon, el a publiká rapòrtnan di progreso, el a buska kontakto ku e otro partidonan interesá i el a organisá diferente reunion di mesa rondó.
Mester keda tuma akshon
Afortunadamente, a bin mehoranan, maske tambe tin puntonan di atenshon. Van Zutphen: “Tin mihó informashon i guia pa e studiantenan karibense. Banda di esei ta investigando kon studiantenan karibense por haña nan BSN mésora na momentu ku nan ta hasi nan petishon pa finansiamentu di estudio via DUO. Mi ta haña esakinan ta bon i bunita paso. Na otro banda di e medaya tin e echo ku esaki no por wòrdu reglá pa studiantenan ku ta kuminsá e aña eskolar benidero, 2023-2024. Mi ta haña esei lamentabel i desapuntante. Banda di esei mi ta mira ku studiantenan tin mester di ayudo pa haña bibienda i pa inskribí na tempu na Basisregistratie Personen (BRP) di munisipio. Tambe nan tin mester di mas ayudo pa komprondé e legislashon i regulashon kompleho na Hulanda. Ademas mi ta mira ku kétubai tin problema ku pagamentu bèk di e debenan di estudio ora di bai e islanan bèk. P’esei, niun di nos por floha i nos mester sigui traha pa bai dilanti.”
Ombudsman ta pasa su tareanan ofer
Awor ombudsman ta pasa su tareanan ofer pa otronan. E último añanan a traha un base fuerte. E partidonan adekuá sa kon pa haña otro i e tarea ta bon kla. P’esei ombudsman ta urgi Regiegroep Studiesucces Caribische Studenten pa wak – kaminda ta posibel huntu ku Arubahuis, Curaçaohuis i Sint Maartenhuis – kiko tin mester pa solushoná e problemanan ku a sobra pa e studiantenan karibense mas lihé ku ta posibel. Anto keda hala atenshon di e instanshanan gubernamental riba esaki. Naturalmente, ombudsman ta keda sigui e desaroyonan i e lo yuda e studiantenan karibense ora nan tin keho.
