70 keho i pregunta durante oranan di konsulta na Boneiru

Nieuwsbericht
Twee vrouwen zitten op een bankje in de wachtkamer. De foto is genomen op Bonaire.

Siman pasá e tim di Nationale ombudsman tabata na Boneiru. Nan a bolbe organisá oranan di konsulta. Repartí entre tres ora di konsulta, e tim a tuma mas o ménos 70 pregunta i keho pa trata. Entre esakinan tambe tabatin algun keho i señal pa Kinderombudsman.

E kehonan i señalnan ku e tim di Nationale ombudsman a risibí ta trata tokante diferente instansha gubernamental. Ta trata tokante tantu instanshanan di Atministrashon Públiko komo di gobièrnu lokal (Entidat Públiko).

Kordinador Gaby von Maltzahn: “E popularidat di Nationale ombudsman ta krese na Hulanda Karibense. Mas i mas nos ta tende di esnan ku ta bishitá nos, ku nan ta bin serka nos pasó nan sa ku realmente lo hasi algu ku nan kehonan”.

Kehonan Entidat Públiko Boneiru

E keho ku nos ta tende mas tantu te ainda ta ku hende no ta haña reakshon na momentu ku nan entregá un keho na Entidat Públiko Boneiru. Mas tantu ora ta trata tokante hasimentu di petishon pa un pèrmit i asuntunan di èrfpagt.

P’esei durante e bishita a kuminsá ku un investigashon na e manera kon Entidat Públiko Boneiru ta trata keho. Ta bon pa mira ku nan ke drecha e manera kon nan ta trata keho. Por ehèmpel dor di nan partisipashon na e tayer tokante tratamentu di keho ku e tim di Nationale ombudsman ta duna na Boneiru awe.

Oranan di konsulta na Hulanda Karibense na 2022

Na sèptèmber e tim di Nationale ombudsman lo ta na Boneiru atrobe. Anto na novèmber di e aña akí nan lo ta na Saba i Sint-Eustatius. Lo anunsiá lugá i ora na e website di Nationale ombudsman i na e página spesial di Facebook pa Hulanda Karibense.

Naturalmente e tim di Nationale ombudsman i Kinderombudsman ta trata tur keho i señal ku a drenta di manera digital tambe. Kaminda ta nesesario, ta involukrá e instanshanan gubernamental konserniente pa trata e keho korektamente.