Nationale ombudsman: no ta huzga tokante entrada hudisial na un kas dor di Korps Politie Caribisch Nederland

Nieuwsbericht
Politie op Bonaire

Nationale ombudsman no ta huzga den kaso di un keho di un habitante di Bonèiru kontra Korps Politie Caribisch Nederland (KPCN), esta e kuerpo polisial di Hulanda Karibense. E deklarashonnan di e partidonan konserní ta muchu leu for di otro i no tin un rapòrt profeshonal.

Pa e motibu akí ombudsman no por determiná ta kiko eksaktamente a akontesé durante e entrada hudisial na e kas. Ombudsman ta haña sí ku ta asina ku Koninklijke Marechaussee a faya den su informe tokante e entrada hudisial na e kas anto di e manera ei a aktua kontra e profeshonalismo nesesario. Esaki ta loke Nationale ombudsman ta skibi den su rapòrt nobo.

Prosès verbal inkompleto

E keho di e petishonario ta trata tokante aktuashon di e ámtenarnan polisial di KPCN na Bonèiru. Sigun e petishonario, a usa violensia durante e entrada hudisial na e kas. Deklarashonnan di e ámtenarnan di polis ta kontradesí esaki. E prosès verbal di Koninklijke Marechaussee, ku a haña òrdu di KPCN pa hasi e entrada hudisial na e kas, lo mester duna kontesta konkluyente tokante e aktuashonnan durante e entrada hudisial na e kas. Pero den e prosès verbal akí ta falta informashon ophetivo, motibu pa kua ta imposibel pa stipulá kiko a sosodé.

Rekomendashon pa Koninklijke Marechaussee

Ombudsman no por huzga tokante aktuashon di polis si no tin un informe profeshonal. Pa e motibu ei e ta rekomendá Koninklijke Marechaussee pa semper despues di un entrada hudisial, traha un prosès verbal ku ta kumpli ku e profeshonalismo i eksihensianan legal rekerí.