Ombudsman: 'Maneho di pobresa pa hende grandi na Karibe Hulandes mester haña prioridat’

Nieuwsbericht
Vrouw zit aan tafel en leest document (Caribisch NL)

Hende grandi na Karibe Hulandes ku ta biba na rant òf bou di e liña di pobresa ta eksperensiá diferente problema. Nan tin muchu tiki sèn pa nan por kumpli ku nan promé nesesidatnan di bida, tin muchu tiki fasilidat (kuido) i no sa pa kua areglo nan ta bini na remarke.

Esei Nationale ombudsman ku ta Ombudsman pa Boneiru, Statia i Saba tambe Reinier van Zutphen a konstatá den su rapòrt Oog voor ouderen in Caribisch Nederland, tokante e problemátika relatá na pobresa na Karibe Hulandes.

Van Zutphen: 'No ta straño ku hopi hende grandi na Karibe Hulandes ta sufri un bida inhumano. Maneho ku ta garantisá seguridat di nan eksistensia mester haña prioridat real awor.’

Pobresa amargo

Hende grandi ku ta haña solamente penshun di behes (AOV Uitkering kompará ku e AOW Uitkering na Hulanda) no por òf apénas por sobreviví i ta biba den un pobresa amargo, Ombudsman a konstatá. Gastunan di promé nesesidatnan di bida na Karibe Hulandes hopi bia ta dos bia mas haltu ku na Hulanda Oropeo, miéntras e penshun di behes ta mas o ménos igual ku e AOW Hulandes. Gastunan di bibienda ta haltu i hasi kompra ta karu. Hopi hende grandi no por paga berdura i fruta fresku. I grandinan ku tin derecho riba por ehèmpel Bijzondere Onderstand (kompará ku e Bijzondere Bijstand Hulandes) hopi bia no sa di esaki pa motibu ku no tin maneho di prevenshon di pobresa. Dor di esaki nan ta resultá mas lihé bou di e liña di pobresa. 

Insufisiente fasilidat

E fasilidatnan pa grandinan na Karibe Hulandes no ta sufisiente. No tin òf kasi no tin transporte públiko, p’esei grandinan ta biba isolá. Ademas nan ta dependé di tokonan den besindario i no por buska ganga i dor di esei kompra ta sali mas karu. Pa kuminda hopi bia nan ta dependé di pasadia pero tin skarsedat di lugá. Kuido na kas ta hopi limitá i no tin sentronan di rehabilitashon spesífiko.

Nesesidat di aserkamentu integral

Van Zutphen: 'Apesar di tur problema e grandinan na Karibe Hulandes apénas  ta keha di nan situashon, esaki pa motibu di orguyo i prinsipalmente bèrgwensa. Pero e situashon aki no ta aseptabel i mester di mehorashon rápido. Tur gobièrnu mester traha huntu aworakí riba tur frontera pareu.'

Segun Ombudsman tin mester tambe un aserkamentu integral ku un maneho rígido pa garantisá seguridat di eksistensia di e grandinan na Karibe Hulandes. Ombudsman ta haña ku e medidanan di Staatssecretaris di Sociale Zaken en Werkgelegenheid, ku el a anunsiá den su Karta na Kamer  27 di yüni no ta sufisiente konkreto. Pa Ombudsman no tin muchu klaridat kua gobièrnu ta ehekutá kua paso i ken ta enkargá ku esaki. Tur kos ta mustra tambe ku e  oumento di AOV Uitkering (penshun di behes) menshoná den e karta pa Kamer no ta sufisiente.

Van Zutphen: 'Pero mas importante  ta pa no yuda grandinan na Karibe Hulandes ku sèn so. Nan tin nesesidat di mehoransa rápido di e fasilidatnan. Esei gobièrnu mester kuminsá kuné tantu na Karibe Hulandes komo na Hulanda Oropeo.’

‘Mesa Karibense’

Ombudsman ta haña ku un ‘Mesa Karibense’ ta nesesario. Pa esaki tur departamentu ku tin un tarea na Karibe Hulandes mester forma parti di dje, bou di maneho di Ministerio di Binnenlandse Zaken en Koninkrijksrelaties.

‘Instansianan gubernamental ta sali muchu for di nan propio tarea, outoridat i presupuesto,’ Van Zutphen ta bisa. ‘Nan no ta realisá sufisiente ku nan maneho ta yega serka di e grandinan vulnerabel na Karibe Hulandes.’ Ombudsman ta haña ku gobièrnu mester wak e situashon di bida riba e diferente islanan mas tantu dor di e brel di e grupo ei. P’esei e ta boga pa embolbí grandinan i asistentenan sosial proaktivo na desaroyo di maneho.

Nationale ombudsman ta bishitá 11 di sèptèmber Boneiru pa kòmbersá  tokante su rapòrt ku representantenan di instansianan gubernamental i organisashonnan sosial. Di e forma ei e ke inisiá un diálogo entre gobièrnu i asistentenan sosial komo e promé stap na mehorashon di e fasilidatnan pa grandinan na Karibe Hulandes.

Historia

For di 2010 Boneiru, Saba i Statia ta munisipionan spesial di Hulanda. Huntu nan ta forma Karibe Hulandes. For di eksistensia di Karibe Hulandes Nationale ombudsman ta atendé keho riba instansianan gubernamental di Reino riba e islanan. For di 2012 e ta atendé keho riba e instansianan gubernamental lokal, esta Entidatnan Públiko tambe. Diferente bia pa aña Nationale ombudsman i òf su tim ta na Karibe Hulandes. Nan ta tene oranan di konsulta i ta kòmbersá ku representantenan di instansianan (gubernamental). 

E último añanan nan ta haña, durante nan bishitanan, hopi señal di pobresa (skondí) na Karibe Hulandes. Pobresa ta un tópiko importante pa Nationale ombudsman. I e situashon finansiero di e grandinan vulnerabel na Karibe Hulandes for di 2010, kontrali na tur espektativa, no a mehorá. P’esei Ombudsman a tuma desishon pa inisiá ku un investigashon na e problemátika relatá na pobresa bou di grandinan na Karibe Hulandes.

E investigashon aki ta e promé di un seri di investigashon tokante pobresa na Karibe Hulandes. Ta kontinuá ku mas investigashon tokante pobresa bou di mayornan soltero i adultonan yòn na Karibe Hulandes. Ombudsman ta spera ku pa fin di 2020 por presentá, a base di e tres investigashonnan aki, un vishon tokante pobresa na Karibe Hulandes.