Reinier van Zutphen a hura komo Ombudsman Nashonal

Nieuwsbericht
Ombudsman Nashonal Reinier van Zutphen

Awe Presidente di Tweede Kamer di Hulanda, Anouchka van Miltenburg, a hura Reinier van Zutphen komo Ombudsman Nashonal. Van Zutphen, den un promé reakshon a bisa: ‘Gobiernu mester realisa bon ki influensha e tin riba bida diario di hende.’

Van Zutphen lo tuma tempu pa tuma bon konosementu di e trabou di Ombudsman Nashonal. ‘Pero mi ta ripara ku e topiko i kehunan ku siudadano tin ta presenta nan mes, manera desentralisashon di tarea di Gobiernu Federal pa ku munisipalidat.’ E ombudsman lo organisa na mitá di luna di aprel un kongreso pa miembro di konsilio di munisipalidat i alkalde i wethouder, tokante tratamentu di kehu na nivel di munisipalidat.

Otro topiko ku na e momentu aki ta pidi su atenshon ta e problemanan rònt di pagamentu di PGB i e kantidat haltu di kehu ku e ombudsman a risibí anja pasá riba Belastingdienst. Kada un topiko tin impaktu grandi riba bida diario di siudadano.

Van Zutphen (Wageningen, 1960) tin eksperensia ekstensivo komo hues na Utrecht, Den Haag, Almelo, Luxemburg, Amsterdam, Kòrsou i Alkmaar. Ademas e tabata entre otro presidente di Asosiashon Hulandes pa Atministrashon di Hustisia (Nederlandse Vereniging voor Rechtspraak). Desde 2012 e tabata presidente di Tribunal di Apelashon pa komersio i industria. E eksperensia aki e lo hiba ku ne pa su funshon nobo di Ombudsman Nashonal. ‘Den mi eksperensia di anjanan largu komo hues mi a konstata ku si hende, siudadano i gobiernu, a skucha otro mas mihó, alfin nan lo no tabata tin mester di un hues.’ Na luna di febrüari Tweede Kamer a vota pa nombramentu di Van Zutphen. Su termino di trabou ta kuminsá awe i ta dura seis anja.

E Ombudsman Nashonal ta un instituto independiente ku anualmente ta risibi mas ku 36 mil kehu ku hende tin tokante nan problema ku gobiernu. Despues ku Alex Brenninkmeijer a tuma despedida dia 31 di desèmber 2013, Frank van Dooren a funshona komo Ombudsman Nashonal. Van Dooren ta bai ku penshon dia 1 di aprel.