Gaby von Maltzahn, kordinadó na Nationale ombudsman

"Kambia di pensamentu pa loke ta trata Hulanda Karibense"

Riba é página

    Gaby von Maltzahn

    E habitantenan di Boneiru, Sint-Eustatius i Saba por aserká Nationale ombudsman na momentu ku nan tin keho tokante gobièrnu na e islanan. Kordinadó Gaby von Maltzahn: “Nos por pone preshon i esei ta yuda.”

    For di 2010 Nationale ombudsman ta yuda siudadanonan na Hulanda Karibense ku tin keho tokante Atministrashon Públiko. Anto for di 2012 nan por duna keho tokante gobièrnu lokal: esta e Entidatnan Públiko. Señora Gaby i su koleganan ta traha na Den Haag i nan ta na e islanan regularmente.

    Kontakto personal

    "No ta posibel pa simplemente hasi investigashon di keho i señal tokante aktuashon di gobièrnu na Hulanda Karibense sintá na Hulanda Europeo so. Pa sa kiko ta sosodiendo, bo mester bai e islanan” señora Gaby ta haña. “Ta na e islanan, kana i kore rònt, papia ku siudadano, organisá ora di konsulta, papia ku mandatarionan. Ta niuskir, tin interes.

    No semper ta funshoná pa traha sita delantá pa pasa serka un hende ku bo tin mester. Pero na momentu ku nos ta pará dilanti su porta, e ta yuda nos di manera masha servisial. Kontakto personal ta masha importante na momentu ku bo ke sa kiko e personanan ke realmente. P’esei nos ta haña mas informashon kompará ku ministerionan na Den Haag. Ta klaro ku esei tambe tin di aber ku nos posishon. Na Den Haag nan no konosé e historianan ku nos ta tende.”

    Sin prehuisio

    Durante e último añanan Gabys su tim a siña hopi tokante kua maneho ta funshoná mihó pa siudadanonan i gobièrnunan na Hulanda Karibense. “Nos tin bon bista di e kultura i mentalidat. Esakinan ta otro ku aki na Hulanda Europeo. Nos ta traha sin prehuisio. Esei ta zona lógiko. Pero den práktika nos ta mira ku por ehèmpel na ministerionan muchu biaha ainda ta wòrdu pensá for di punto di bista europeo i ta saka konklushonnan a base di esei.”  

    Konfiansa

    Bishitando e islanan frekuentemente, Nationale ombudsman a sa di krea goodwill serka e siudadanonan lokal. Gaby: “Kada biaha e habitantenan ta mira e mésun karanan, anto esei ta duna nan konfiansa den nos. Tambe nan ta ripará ku nos a solushoná problema. Anto ku nan no mester haña ku ta normal pa no reakshoná riba nan kehonan.  

    Banda di investigá keho, awor nos ta enfoká riba problema struktural ku nos ta mira i tende di dje tambe. Manera problemátika di pobresa na e islanan. Ta realmente nesesario i ta wòrdu apresiá ku nos ta (keda) pidi atenshon pa esaki.”   

    Banko di kuminda i kuido di grandinan

    E tim di Gaby ta skohe pa pasa buska mas tantu historia ku ta posibel serka e hendenan mes. “Serka nan mes, pero tambe pa medio di organisashonnan manera e banko di kuminda i kuido di ansiano” e kordinadó ta splika. “Nos ta buska kontakto ku iglesia, esaki ta hunga un papel masha importante aya. E pastor, domi i boluntarionan konosé e hendenan. Entretantu nan konosé nos tambe. Nan ta konfia nos.   

    Por ehèmpel ta di nan nos a tende di e problemátika di refugiadonan na e islanan. Ofisialmente nada ta pasando. Pero ora bo kana riba kaya, bo ta mira e venezolanonan ku a sali nan pais pa buska refugio na Hulanda Karibense.”

    "Nos ta traha masha duru pa ta bon visibel pa tur hende na Hulanda Karibense”, Gaby ta sigui konta. “Esei ta nifiká ku banda di e echo ku nos komunikashon ta na tres idioma (papiamentu, hulandes i ingles) tambe den nos tim nos tin koleganan ku ta papia papiamentu. Di e manera ei nos ta alkansabel pa hende ku únikamente òf prinsipalmente ta papia papiamentu. Afortunadamente e grupo akí ta haña e kaminda pa bin serka nos mas i mas fásil.”

    Vigilante

    E ròl di Nationale ombudsman pa Hulanda Karibense tambe ta pa tene e instanshanan gubernamental skèrpi.

    “Nos ke kontribuí na bon gobernashon na e islanan” Gaby ta splika. “Ta di suma importansha pa nos mustra ku nos tei pa e siudadanonan. E habitantenan mester por konfia ku e maneho ta bon, anto ku e ta esmerá pa su siudadanonan. Nos ta fungi komo un tipo di vigilante. Nos sí ta haña kontesta na momentu ku nos puntra gobièrnu algu. Mientras ku e siudadano no ta tende nada i ta haña tende ku ainda e ta number shete riba lista di espera…méskos ku e tabata tres aña pasá. Nos por pone preshon i esei ta yuda. Banda di esei hopi biaha ta konta sí ku nos mester keda riba nan pa nos mira akshon.”

    Investigashon

    Gaby: “Nos ta hasi investigashon i tambe intervenshon. Den kaso di intervenshon nos ta yuda hende direktamente yamando instanshanan na momentu ku tin un problema. Òf despues ku nos tabatin un ora di konsulta na e isla, nos ta pasa serka un instansha. Na e islanan papia ta parti di e kultura, pues intervenshon ta funshoná bon.

    Pero nos ta mira ku un rapòrt di investigashon tambe ta masha efektivo. Medionan di komunikashon ta duna atenshon na esaki, anto e outoridatnan ta sinti ku nan mester hasi algu kuné. Tambe na Hulanda, serka gobièrnu na Den Haag, nos rapòrtnan ta haña bon akohida.”   

    Mónitòr

    Nationale ombudsman ta presentá su rapòrtnan na e gobièrnunan konserní na e islanan. “Nos ta mira un mihó koperashon i kordinashon entre gobièrnu, komo puntonan di atenshon grandi. Esei a sali na kla, por ehèmpel, despues di nos investigashon tokante pobresa entre grandinan soltero. Un di nos rekomendashonnan tabata pa organisá transporte públiko mihó. Ministerio di Asuntunan Interior i Relashonan den Rèino a bisa nos ku nan a regla algun bùs. Pero entre tantu na e isla mes ta parse ku niun hende no tabata sa di nada. Pero nos ta sigui mónitòr nos rekomendashonnan i nos no ta laga lòs.”

    Inkomprensibel

    E ta haña ku ainda tin trabou pa hasi. “Un ehèmpel mas: na Den Haag tabatin plan pa drecha e kayanan na un di e islanan. Pero una bes e plannan tabata kla: nan no por a wòrdu ehekutá. E tera no ta apto pa e plannan ei. Mi ta haña inkomprensibel ku tur kos ta tarda asina hopi. Esei no ta algu ku bo mester por a pensa promé? Aki na Hulanda Europeo nos mester pensa di otro manera tokante Hulanda Karibense. Mester tin un mihó koperashon i kordinashon.”

    Ken Gaby von Maltzahn ta?

    Promé ku el a kuminsá traha pa Nationale ombudsman na aña 2011, Gaby von Maltzahn - entre otro - a traha komo hurista pa Konseho di Estado i pa korte. Dos aña despues di su yegada investigadó Gaby a haña Hulanda Karibense den su portafolio. E trabou di Nationale ombudsman na Hulanda Karibense tabata djis kuminsando. Entretantu e ta kordinadó di un tim núkleo di shete persona. Su tim tin komo prioridat haltu pa: ta visibel serka siudadanonan na Hulanda Karibense, yuda nan pa haña e kaminda i kontribuí na un bon gobernashon na e islanan. E ta bishitá Karibe dos te tres biaha pa aña.