Jeanine Verhoef: "Ora mi tende ku hende ta keda pegá mi ta rabia”

Riba é página

    Jeanine Verhoef

    Jeanine Verhoef ta haña ta importante pa defedé derecho di individualnan. Esei e ta hasi den 2020 den su funshon komo lider di proyecto ku e tema Akseso na provishon na Nationale ombudsman. Ta na kua tipo di fasilidat ta referí na dje? Anto ta kiko Jeanine ta gusta asina tantu di su trabou na Ombudsman?

    “Di kuido te enseñansa i di ònderstant te rèibewèis: nos mester tin akseso na tur e fasilidatnan akí. Ta gobièrnu mester sòru p’esei, pero den práktika esei sa bai robes.”

    Opstákulo ora pidi fasilidat

    “E tema Akseso na fasilidat ta trata tokante preguntanan importante manera: Tur hende por partisipá den komunidat? Anto bo sa unda bo por haña ayudo ora bo tin mester di esaki? Bo no mester topa yen opstákulo pa por hasi uso di e fasilidatnan ku bo tin derecho riba dje. Opstákulo manera: bo mester warda lunanan promé ku nan trata bo petishon, nan ta manda bo djaki p’aya òf proseduranan ta muchu kompliká.

    Manera rèibewèis. Si bo tin 75 aña di edat òf mas, anto bo rèibewèis ta den kaduká, bo mester laga hasi un chekeo médiko. Esei ta masha kompliká. Pa motibu di lista di espera largu i eskases di dòkter na CBR, tabata dura masha largu promé ku tabata disidí tokante un hende su kapasidat pa kore outo. Esei por tin konsekuensia fèrfelu. Por ehèmpel ora di ripiente bo mester bai hòspital ku outo.

    Aworaki CBR ta trahando duru pa keda kla ku tur e trabounan atrasá. E instansha gubernamental tambe a hasi tur esfuerso pa haña solushon pa hende por sigui kore outo ku un rèibewèis ku a kaduká kaba.

    Por mas di loke bo ta kere

    “Di un banda e krísis di Corona ta sòru ku hende tin ménos akseso na fasilidatnan. Por ehèmpel ta asina ku un parti di kuido na kas i kuido pa hóben no por a sigui. Di e manera akí tabata evitá e riesgo di infekshon.  

    Alabes e vírùs di Corona tambe tabatin un influensia positivo. Di ripiente tabatin akohida pa hende sin kas. Miéntras ku ántes esei tabata imposibel. Asina bo ta mira, ku hopi biaha por mas di loke bo ta kere.”

    Mas adrès pa hende sin kas

    “Mi ta orguyoso riba e investigashon opstákulo di hendenan outosufisiente sin adrès. Aki ta trata di personanan ku a pèrdè nan bibienda pa motibu di por ehèmpel òntslag, divorsio òf debe. E grupo akí ta haña tiki atenshon ya komo nan no ta adikto, ni tampoko nan no tin problema sikiátriko.

    Pero tambe serka nan problema ta akumulá. Komo ku (temporalmente) nan no tin adrès, nan no ta pas den e reglanan. Si nan no ta registrá den Basisregistratie Personen (BRP), ta parse manera nan no ta biba na Hulanda mas. Nan no tin adrès pa risibí pòst, ni derecho riba ònderstant i problema ku mantené un seguro.

    Nos a trese e problemanan akí dilanti. Tambe nos a hasi un yamada na gobièrnu: sòru pa e grupo akí no kai den mas problema. Ofresé nan ayudo na midí i pensa den solushon. Kiko e persona akí tin mester? Nos por inskribié temporalmente den un parke di rekreashon? Anto sòru pa e persona keda registrá den BRP tòg, pa e por mantené su adrès pa pòst (e asina yamá briefadres)?

    Na 2020 nos a wak ta kiko a sosodé ku nos rekomendashonnan. E ministerio a traha un plan di maneho pa mas bibienda i akohida, mihó guia i prevenshon di personanan sin kas. No ta bai masha lihé pero tin progreso.”

    Siña di e krísis di Corona

    “Por siña di e krísis di Corona. Pasó tambe tin hopi kos ku a bai mihó den e último tempunan, manera akohida di hende sin kas. Danki na esaki nan a haña chèns pa sosegá i pone nan bida mas na òrdu. Mi ta spera ku gobièrnu ta keda mantené e aktitut proaktivo akí den futuro.”

    Ken ta Jeanine? 

    Jeanine Verhoef (61) ta biba na Rotterdam. E ta kana i kore baiskel hopi. Tambe e ta gusta kanta. Na 2005 Jeanine a kuminsá traha na Nationale ombudsman. Promé ku esei e tabata traha komo abogado di derecho di estranhero.

    Ya for di tempu ku mi tabata yòn, mi ta haña importante pa lucha pa derecho di e individuo. “Tur hende mester por partisipá. Ora mi tende ku hende ta keda pegá serka gobièrnu mi ta rabia mashá. Gustosamente mi ta traha pa nan.”

    Loke e ta gusta asina hopi di su trabou na Nationale ombudsman? “Mi ta haña interesante pa pensa tokante opstákulonan. Anto seguidamente pa taha lista ku kosnan ariba, ku gobièrnu por hasi algu kuné. Toka e sentro i pensa den direkshon di solushon.