Investigashonnan ku tin impakto: keda preshoná

Riba é página

    Three caribbean students at a table studying

    Ora kos bai robes entre siudadano i gobièrnu, Nationale ombudsman por intervení òf media. Tambe e por inisiá un investigashon. Esaki ta sosodé mas o ménos 50 biaha pa aña. Pero kon ombudsman ta manehá un investigashon asina? A base di e investigashon ‘Dolor di kabes di studiante karibense’ por tira un bista den kushina di ombudsman.

    E investigashonnan na 2020

    Nationale ombudsman su investigashonnan ta partí den dos kategoria: tin e investigashonnan ku ta keda hasí a base di keho individual, anto tin esnan ku ta keda inisiá di propio inisiativa. Na aña 2020 Nationale ombudsman a hasi un total di 56 investigashon.

    Studiante karibense

    E investigashon 'Dolor di kabes di studiante karibense' na problema di studiante ku ta bini di e parti di Karibe di Reino hulandes, ta un ehèmpel di un investigashon ku Nationale ombudsman mes a inisiá. Pa medio di diferente kanal el a bin tende ku e studiantenan akí ta topa diferente tipo di problema. E señalnan akí tabata motibu pa ombudsman buska haña sa ta kiko esaktamente ta pasando.

    Enfoke investigativo

    Señora Annemarie Tuzgöl a manehá desénas di investigashon na ombudsman. E tabata na enkargo komo lider di proyekto di e investigashon ‘Dolor di kabes di studiante karibense’. Huntu ku tres investigadó el a investigá ta kua problemátika studiantenan ta topa ora nan ta (bai) studia na Hulanda òf ora na a studia na Hulanda. E ta splika kon e ta manehá un investigashon asina.

    “Na promé lugá bo mester formulá e pregunta di manera skèrpi: ta kiko esaktamente mi ke haña sa? Ta kua problema e (èks) studiantenan akí ta topa den práktika, unda e dilemanan ta, anto ta kua ta e posibel solushonnan? Seguidamente nos a konektá esakinan ku metanan kla. Al final e propósito ta pa e investigashon tin efekto, anto ku e situashon ta mehorá. Den e kaso akí pues di e studiantenan karibense. Nos meta no ta pa únikamente pone problema riba un agenda, ta importante ku nos – for di perspektiva di e siudadano – ta señalá kiko por mehorá.”

    Enkuesta i grupo di enfoke

     “Pa e investigashon akí, huntu ku un ofisina di investigashon, a saka un kuestionario i kompartié ku studiantenan karibense ku ta òf a studia na Hulanda. En total tabatin 624 studiante ku a yena e kuestionario kompletamente. Banda di esaki a organisá un kantidat di kòmbersashon den gruponan di enfoke ku studiantenan karibense. Durante esakinan a papia mas detayá tokante e problemátika.”

    Hopi interlokutor

    Aparte di papia ku studiante e investigadornan tambe a papia ku diferente organisashon i instansha. Pa kuminsá a papia ku empleadonan di e ministerio di Ensañansa, Kultura i Siensia. Tambe a kòmbersá ku Dienst Uitvoering Onderwijs (DUO), Sociale Verzekeringsbank (SVB), Rijksdienst voor Identiteitsgegevens (RvIG), Zorgverzekeringslijn, Kences, Stichting DUWO, SSH Student Housing. Anto banda di esei ku organisashonnan ku ta guia i apoyá studiante karibense manera Arubahuis, Stichting Studiefinanciering Curaçao (SSC), TuranGoeloe, Unified St. Maarten Connection (USC), WeConnect, Vereniging Levende Talen Papiaments, HvAnti i Stichting Kompas For Students. Tambe e investigadónan a bishitá diferente webinair. Ademas a inkluí dokumentonan di maneho, dokumentonan di parlamento i rapòrtnan relevante den e investigashon akí. Nationale ombudsman ademas a buska koperashon di e defensornan di pueblo di Kòrsou i Sint Maarten tambe. A klousurá e investigashon ku dos kòmbersashon di mesa rondó.

    Suseshon

    Den e rapòrt - ku ta disponibel na hulandes, papiamentu i ingles - tin un kantidat di  konklushon fuerte i rekomendashon deskribí. Kon bo ta evitá ku un rapòrt asina no ta disparsé den un lachi?

    “Mas i mas nos ta monitòr loke ta hasi ku e rekomendashonnan di nos rapòrtnan” señora  Annemarie Tuzgöl ta splika. “Nos ta hasi esei dor di por ehèmpel despues di un tempu bolbe organisá un kòmbersashon di mesa rondó. Nos ta hasi esaki ku tur ku tabata enbolbí i nos ta papia tokante loke realmente a mehorá. Of nos ta sòru pa nos sinta na mesa ku e instanshanan. Si nan ta konstatá ku a hasi muchu tiki, por ta posibel ku nos ta lanta un investigashon di restropekshon. Asina nos ta keda pone preshon i nos ta sigur ku e rapòrt ta keda riba e agenda (polítiko).”

    Studiante karibense den pertá

    Kada aña mas o ménos 1.600 hóben di Kòrsou, Aruba, Sint Maarten i Hulanda Karibense ta yega Hulanda ku masha gana i kurashi pa kuminsá ku nan estudio na Hulanda. Lástimamente hopi di nan ta bin topa kantidat di blokeo i p’esei nan no ta alkansá e meta final. Nationale ombudsman a investigá e opstákulonan ku e talentoso hóbennan akí ta topa na Hulanda.

    Regularmente ya durante di e preparashonnan kos ta bai robes, anto una bes na Hulanda e studiante karibense ta bin topa kantidat di opstákulo tantu den asuntunan práktiko manera bibienda, seguro di kuido i estudio. Pero prinsipalmente den e área kultural. Dosentenan òf kostudiante tin tiki atenshon pa e problemanan espesífiko di e grupo di studiante hulandes akí. Hopi biaha ora nan kaba di studia nan ta keda atras ku un debe di estudio problemátiko.

    Señor Reinier van Zutphen, Nationale ombudsman, ta pidi e gobièrnunan den Reino pa kita e opstákulonan ku e studiantenan ta topa.

    Señor Van Zutphen ta bisa: “E hóbennan akí ta di gran importansha pa futuro di e islanan. Ta importante ku nan estudio na Hulanda ta forma un base positívo pa un karera éksitoso na kas òf na Hulanda. Ta p’esei tin biaha nan tin mester di un tiki apoyo èkstra. Instanshanan (gubernamental) no por asumí asínasina ku nan por para riba nan mes pia totalmente i sa kon e komunidat kompleho hulandes ta funshoná.”

    Ombudsagenda

    Den e asina yamá Ombudsagenda por haña e temanan ku ombudsman ke duna èkstra visibilidat na dje. Ta traha e agènda akí tur aña. Na aña 2020 Nationale ombudsman, Ombudsman pa mucha i Ombudsman pa Veterano a dirigí nan mes riba sinku tema: Derechonan fundamental, Partisipashon i influensha, Askseso na fasilidatnan, Pobresa i Abitabilidat. Por haña e agèndanan di ombudsman pa 2020 i 2021 aki.

    Ombudsagenda 2020

    Ombudsagenda 2021