Diferensia kresiente entre felisidat di mucha

Riba é página

    Two kids with phones in their hand laying and sitting on the couch

    Kada dos aña Kinderombudsman ta puntra mas tantu mucha na Hulanda ku ta posibel, kiko sí i kiko nò ta bai bon den nan bida. E meta ta pa stimulá organisashonnan pa hasi algu ku e resultadonan. For di e investigashon a sali na kla ku e limitashonnan di Corona tabata mas impaktante hustamente serka muchanan vulnerabel.   

    Si bo puntra nos

    ‘Si bo puntra nos’ ta nòmber di e investigashon na 2020. Esaki ta e di tres edishon di e investigashon ku Kinderombudsman ta hasi kada dos aña. Pa e investigashon akí mucha ta yena un kuestionario ekstenso online. E enkuesta akí tabata aksesibel mitar aña largu riba website di Kinderombudsman. Pa medio di medionan sosial komo Facebook, Instagram i Twitter a pidi atenshon pa e enkuesta. Tambe Kinderombudsman a aserká mucha pa medio di diferente organisashon, institutonan di kuido i hustisial hubenil. Finalmente kasi 2000 mucha a yena e kuestionario.   

    Gira pa Derecho di Mucha: ‘Na kas den 2020’

    Un parti fiho di e investigashon ta e Gira pa Derecho di Mucha.

    Huntu ku su tim Kinderombudsman ta bai diferente siudat pa papia ku mucha. Kada biaha e Gira pa Derecho di Mucha tin un tema. E biaha akí e tema tabata ‘Na kas den 2020’. Kinderombudsman a skohe pa durante e investigashon akí dirigí su mes, spesialmente riba mucha ku no ta biba na kas, òf ku ta krese den un situashon difísil na kas. Kinderombudsman en espesial a investigá kiko e muchanan akí ta haña importante pa futuro, kompará ku mucha ku ta krese sin problema.

    Investigadó señora Alexandra de Jong: “Na aña 2016 a bini ku e Gira pa Derecho di Mucha, ku komo meta pa papia ku mas tantu mucha ku ta posibel tokante kon ta bai ku nan. Den transkurso di tempu e enfoke di e Gira pa Derecho di Mucha a kambia gradualmente. Awor nos ta enfoká prinsipalmente riba e muchanan vulnerabel ku tin un chèns mas grandi pa enkontra problemanan èkstra den nan bida.”

    Corona

    Pa motibu di e medidanan di Corona mester a adaptá e Gira pa Derecho di Mucha un tiki sí. Investigadó Marit Hopman: “Mientras ku otro añanan nos tabata hasi sigur dies bishita, e aña akí tabata únikamente kuater. Di e kuaternan akí, dos tabata online. Un prizòn hubenil i un sentro pa buskadó di asilo. Na e asilo akí e muchanan ta biba ku nan mayornan, afortunadamente nos por a pasa hasi un bishita en persona sí.”

    Diferensia den felisidat

    Pa motibu di e medidanan di Corona, e situashon na kas tabata kisas e tema di mas importante den bida di mucha i hóbennan. For di e investigashon di Kinderombudsman a sali na kla ku hustamente pa mucha vulnerabel e limitashonnan di Corona tabata impaktante. E krísis di Corona a trese  e Diferensia den felisidat entre muchanan hulandes na bista di manera skèrpi.

    Mayoria di mucha hulandes ta parse di ta mashá felis, tambe den tempu di Corona.

    Den e investigashon di Kinderombudsman mucha ta duna nan bida un sifra di rapòrt promedio di 7,8. Esaki ta un punto désimo mas haltu ku na 2018 i asta mitar punto mas haltu ku na 2016. Lástimamente no tur mucha ta asina kontentu. Den institutonan será mucha ta duna nan bida ‘únikamente’ un 5,6. Anto mucha ku sí ta biba na kas – pero ku tin di aber ku plèitamentu i/òf violensia – ta duna nan bida un 6,6.

    Sinti bo na kas

    En general e investigashon ta indiká ku mucha ku no ta biba na kas i mucha ku ta krese ku un problema den nan situashon na kas, ta balorá e kalidat di nan bida mas abou ku mucha ku ta krese sin problema. Esaki ta komprendibel mirando e problemátika ku e muchanan akí tin di aber kuné. Sinembargo e grado den kua e gruponan akí ta diferenshá ta remarkabel.

    Mucha ku na kas tin di aber ku plèitamentu i/òf agreshon, ta duna nan bida e sifra di mas abou di tur mucha ku ta biba den un situashon na kas kaminda tin un problema. Di e muchannan ku no ta biba na kas, esnan ku ta biba serka un famia di kriansa, ta balorá nan bida mas haltu. Esaki riba su mes no ta sorprendente mirando ku mucha ta preferá pa krese mas tantu ku ta posibel den un hogar, pues ‘na kas’.

    E investigashon tambe ta demostrá ku riba e mucha vulnerabel e medidanan di Corona tabatin mas efekto negativo ku riba mucha sin problema. Mucha ku ta biba den un institushon, no ta mira nan famia den e periodo akí, anto nan tin di aber ku fadamentu ya komo tin ménos skol i aktividatnan (pafó).

    Rekomendashon

    Kinderombudsman ta konstatá ku algun grupo di mucha vulnerabel tin mester di mas atenshon pa dil ku e konsekuenshanan negativo di nan bida pa nan bienestar i kalidat di bida.

    Marit Hopman: “E sifra abou ku muchanan ku ta biba den institutonan será, ta duna nan bida, ta preokupante. Pa e motibu ei nos ta pidi e institutonan ei pa papia ku e muchanan tokante e ambiente ku nan ta biba aden. Nos ta haña importante ku hóbennan den un institushon asina, ta haña e espasio pa yuda pensa kon por hasi e ambiente di biba mas ameno.”

    Alexandra de Jong: “E impakto di plèitamentu i violensia den e situashon na kas ta preokupante. Señalamentu di e problemanan ei mester por mihó. Ta importante ku banda di organisashonnan manera Veilig Thuis (seif na kas), tambe dosentenan, dòkternan di skol i trahadónan sosial di skol ta èkstra alerto riba señalnan di mucha den un situashon insigur na kas.”

    Reakshon di mucha den e investigashon

    “Mi ta haña importante ku ta sòru bon pa tur mucha i ku pa tur mucha tin un bon lugá. Tambe lo mester tin sufisiente kuminda, bibida i sèn pa nan.”
    - Mucha den un famia di kriansa

    “Na kas bo ta sinti bo mihó. Ei bo por keda, no pa un ratu so. Mi no por sinti mi 100% na kas aki.”
    - Mucha ku ta biba den un grupo

    “Ya hinter mi bida, mi ta biba den grupo. M’a kansa. M’a muda masha hopi biá tambe.”
    - Mucha den un instituto habrí

    “Mi ta haña difísil pa ta será, mientras ku mi no a hasi nada. Anto ku despues di fakansi di zomer mi no por bai mi mes skol. Anto ku mi ta mira mi mama, ruman muhénan i mi amigunan masha tiki. Tampoko mi por ta mi so nunka pa mi kana rònt un tiki òf pa baha mi nèrvio.”
    - Mucha den un instituto será

    “Na kas tin hopi plèitamentu. Durante lockdown mi tabata mas tantu na kas pasó mi skol tabata será i esun di mi ruman muhé nò. Pues ami tabata na kas durante tur plèitu.”
    - Mucha den un situashon problemátiko na kas

    “E personanan ku ami stima, tambe stima mi anto esei ta hasi mi felis.”
    - Mucha ku ta biba na kas i sin problema